اٹلی کا 2026 تا 2028 ’فلوسی ڈکریتو: تین سال میں تقریباً پانچ لاکھ غیر یورپی ملازمین کے لیے ورک پرمٹس جاری ہوں گے

اٹلی نے 2026 سے 2028 تک کے لیے نیا فلو ڈکری (Decreto Flussi) جاری کر دیا ہے، جس کے تحت تین برسوں میں مجموعی طور پر 4 لاکھ 97 ہزار 550 غیر یورپی شہریوں کو اٹلی میں کام کے لیے داخلے کی اجازت دی جائے گی۔ ہر سال اوسطاً ایک لاکھ 64 ہزار 850 ورک پرمٹس مختص کیے گئے ہیں۔ یہ منصوبہ ٹرانسپورٹ، زرعی شعبہ، سیاحت، تعمیرات، مینو فیکچرنگ اور دیگر سیکٹرز میں افرادی قوت کی کمی پوری کرنے کے لیے تیار کیا گیا ہے۔

یہ ڈکری 15 اکتوبر 2025 کو شائع ہوئی اور اس میں موسمی (seasonal) اور غیر موسمی (non-seasonal) دونوں طرح کے ملازمین کے لیے قواعد شامل ہیں، جبکہ چند مخصوص کیٹیگریز کو کوٹے سے باہر (out-of-quota) رکھا گیا ہے۔ اس میں پناہ گزینوں، بے ریاست افراد، نگہداشت کے شعبے میں کام کرنے والوں اور اطالوی نژاد افراد کے لیے خصوصی گنجائش موجود ہے۔

وسیع پیمانے پر قانونی راستے

اقوام متحدہ کی تنظیم IOM نے اس فیصلے کو سراہتے ہوئے کہا کہ وسیع قانونی راستے کھولنا نہ صرف ترقی کا باعث ہے بلکہ یہ لوگوں کو خطرناک راستوں اور استحصال سے بھی بچاتا ہے۔

کن سیکٹرز میں مواقع ہوں گے؟

غیر موسمی ملازمین کے لیے ورک پرمٹس درج ذیل شعبوں میں دیے جائیں گے:

ٹرانسپورٹ اور لاجسٹکس
میٹل ورک اور مکینکس
سیاحت
زراعت اور فوڈ سیکٹر
تعمیرات
مینو فیکچرنگ

خود روزگار یعنی فری لانسرز، اسٹارٹ اپس، آرٹسٹ اور کاروباری افراد کے لیے بھی ہر سال الگ کوٹہ رکھا گیا ہے۔

خصوصی ترجیحات

ترجیح ان ممالک کے شہریوں کو ملے گی جن کے ساتھ اٹلی نے محفوظ ہجرت کے معاہدے کیے ہیں۔ ان میں الجزائر، بھارت، مراکش، سینیگال، سری لنکا، پیرو، تیونس اور یوکرین شامل ہیں۔

اٹلی میں گزشتہ پانچ برسوں میں موسمی طور پر کام کرنے والے افراد کو ملٹی ایئر سیزنل پرمٹ بھی مل سکتا ہے۔

تربیت، تیز پروسیسنگ اور نئے مواقع

ڈکری کے مطابق:

زیادہ شعبوں کو پروگرام میں شامل کیا گیا ہے
ممالک میں تربیتی پروگرام بڑھائے جائیں گے
ہنرمند کارکنوں کے لیے مراعات رکھی گئی ہیں
تعلیم یا ٹریننگ پرمٹ کو ورک پرمٹ میں تبدیل کرنے کی سہولت موجود ہے
درخواستوں کے لیے ڈیجیٹل پری فِلنگ سسٹم متعارف کرایا گیا ہے

آجر (Employer) کے لیے اہم تاریخیں

آن لائن پری فِلنگ: 23 اکتوبر تا 7 دسمبر ہر سال

درخواستوں کی جمع کرانے کی تاریخیں (کلک ڈیز):

12 جنوری: زرعی موسمی کارکن
9 فروری: سیاحت کے شعبے کے موسمی کارکن
16 فروری: ان ممالک کے غیر موسمی کارکن جن کے ساتھ اٹلی کے معاہدے ہیں
18 فروری: دیگر غیر موسمی کارکن

درخواستیں اس وقت خود بخود ختم ہو جائیں گی جب:

31 دسمبر تک کوٹے میں جگہ نہ ملے
ویزا 6 ماہ میں جاری نہ ہو
ضروری دستاویزات مکمل نہ ہوں

دھوکا دہی اور استحصال میں اضافہ

2024 کو اینٹی ٹریفکنگ ہاٹ لائن نے “دھوکے کا سال” قرار دیا۔ متعدد بروکرز اور جعلی ایجنٹس نے ہزاروں یورو لے کر مزدوروں کو ورک کنٹریکٹ، درخواست یا ویزا دلانے کا جھانسہ دیا اور پھر غائب ہو گئے۔

اس دوران:

139 سے زائد متاثرہ افراد کی نشاندہی ہوئی، اصل تعداد اس سے کہیں زیادہ بتائی جاتی ہے
اس استحصال کے باعث 80 فیصد شکایات میں لیبر ایکسپلوئٹیشن شامل تھا

ماہرین نے خبردار کیا ہے کہ فلوسی ڈکریتو کے تحت نئے راستے ضرور کھلے ہیں، مگر جعل سازوں سے بچنے اور قانونی عمل کو یقینی بنانے کے لیے نگرانی مزید سخت ہونا ضروری ہے۔