حکومت تارکین وطن کے خلاف نفرت انگیز مواد روکنے کے لیے ڈیجیٹل پلیٹ فارمز سے تعاون بڑھائے،پی ایس او ای کا مطالبہ

میڈرڈ، 29 نومبر (دوست مانیٹرنگ ڈیسک)پی ایس او ای نے کانگریس میں ایک تجویز پیش کی ہے جس میں حکومت سے مطالبہ کیا گیا ہے کہ وہ ڈیجیٹل پلیٹ فارمز کے ساتھ تعاون میں اضافہ کرے تاکہ تارکین وطن اور غیر ملکیوں کے خلاف نفرت پھیلانے والے مواد کے خلاف مؤثر کارروائی کی جا سکے اور شکایت کردہ مواد کو ہٹانے کے عمل کو مزید تیز اور مؤثر بنایا جائے۔

یہ تجویز ایوانِ زیریں میں جمع کرائی گئی، جس میں یہ بھی کہا گیا ہے کہ حکومت نسل پرستی، غیر ملکیوں سے نفرت اور بین الثقافتی ہم آہنگی کے فروغ سے متعلق آگاہی پروگراموں کی حمایت کرے۔

مزید برآں، گروپ سوشلستا نے سفارش کی ہے کہ حکومت غلط معلومات اور تارکین وطن کے خلاف نفرت انگیزی کے مقابلے کے لیے میڈیا، سوشل نیٹ ورکس اور متعلقہ اداروں کے تعاون سے آگاہی مہم شروع کرے تاکہ جھوٹے بیانیوں اور پروپیگنڈے کی روک تھام ہو سکے جو معاشرے میں نفرت اور تشدد کو بڑھاتے ہیں، اور عوام ایسی سازشی مہمات کو فعال طور پر مسترد کریں۔

تجویز میں یہ بھی کہا گیا ہے کہ حالیہ دنوں میں ریجن آف Murcia کے قصبے Torre Pacheco میں ہونے والے نسلی تشدد کے واقعات دائیں بازو کی جانب سے پھیلائی جانے والی نفرت انگیزی کا نتیجہ ہیں، جو مسلسل بڑھ رہی ہے اور سماجی برداشت، احترام، تنوع اور جمہوری اقدار کو نقصان پہنچا رہی ہے۔

سوشلسٹ پارٹی کے مطابق تارکین وطن کے خلاف پھیلائے جانے والے نفرت انگیز بیانات، جن میں گالیاں، دھمکیاں اور بہتان شامل ہیں، معاشرے میں ایسے حالات پیدا کرتے ہیں جو جرائم کی شکل اختیار کر سکتے ہیں۔ ان کے مطابق سوشل میڈیا اور میسجنگ چینلز پر ایسے مواد میں تیزی سے اضافہ تشویشناک ہے۔

تحقیقاتی مطالعوں کا حوالہ دیتے ہوئے کہا گیا ہے کہ سوشل میڈیا ایسے متنازع اور اشتعال انگیز بیانات کو زیادہ نمایاں کرتا ہے، جس کی وجہ سے تارکین وطن کے بارے میں منفی اور زہریلا مواد سب سے زیادہ پھیلتا ہے۔

آخر میں پی ایس او ای نے کہا کہ وہ ڈیجیٹل پلیٹ فارمز کی ذمہ داریوں کو مضبوط کرنے اور نفرت انگیز مواد کی مؤثر روک تھام کے لیے اقدامات آگے بڑھاتا رہے گا۔