امریکہ کی امیگریشن بند،غیر ملکیوں کے فوائد ختم اور ان کی آبادی کم کرنے کا فیصلہ۔

تحریر : مظہر حسین راجہ بارسلونا

کئی دفعہ یورپ میں رہنے والے اوورسیز کی توجہ اس خاص بات کی طرف دلائی ہے کہ کسی بھی ملک کا قانون اپ کے لیے تبدیل ہونے میں ذرا دیر نہیں لگتی۔ اپ کے پاس کاغذات کچے ہوں یا پکے یا نیشنلٹی۔ اپ نمازی، حاجی یا جتنے بھی پرہیزگار ہوں مقامی لوگوں کے اندر اس کی کوئی اہمیت نہیں۔

اصل اہمیت اپ کے کردار اور روزمرہ کے لین دین کی ہے، اپ کو جس ملک نے بہترین رہائش روزگار اور عزت دے رکھی ہے اس کی سرزمین پر کوئی بھی غلط کام مقامی لوگوں کے اندر نفرت کا باعث بنتا ہے اور کچھ سالوں بعد اپ کے چھوٹے چھوٹے جرائم اسمبلیوں تک پہنچ جاتے ہیں اور پھر اپ کی سہولیات کے قوانین تبدیل ہو کر اپ کے لیے وبال جان بن جاتے ہیں جبکہ مقامی لوگ بھی اپ کو سپورٹ نہیں کرتے کیونکہ میڈیا اپ کے چھوٹے چھوٹے جرائم کو بھی بڑے کر کے دکھا رہا ہوتا ہے اور مقامی لوگوں میں نفرت پھیل چکی ہوتی ہے۔

اس لیے اگر اپ اپنی اولاد کی بہتری کے لیے کسی بھی ملک میں اباد ہوئے ہیں تو اولاد کی تعلیم و تربیت اور ان کے کردار پر توجہ دیجیے۔ یہ ملک اور سرزمین آپ کی ہے اور اپ کی آنے والی نسلوں کی ہے اس لیے اس کا خیال کیجئے اور جو زمین، پلاٹ اور کوٹھیاں اس ملک کی کمائی سے پیچھے بنا رکھی ہیں انھیں بھول جائیے ،وہاں آپ نہ جا سکتے ہیں اور نہ دوبارہ آباد ہو سکتے ہیں، وہ صرف آپ کا ایک خواب ہے جو ایک دن بند صندوق کی صورت میں سیدھا آپ کے گاؤں کے قبرستان میں لمبے خواب میں تبدیل ہو جائے گا۔حقیقت کو جانئے اور جرائم میں ملوث ہونے یا جرائم پیشہ افراد کا ساتھ دینے یا ان کی حوصلہ افزائی کرنے سے گریز کیجیے۔ اس ملک سے بھی اتنی ہی محبت کیجیے جتنی آپ پاکستان سے کرتے ہیں۔