طویل پروازوں میں ایئر ہوسٹس اور اسٹورڈز کہاں سوتے ہیں؟ ایبریا نے “خفیہ کمرہ” دکھا دیا

اسپین کی فضائی کمپنی ایبریا نے ٹک ٹاک پر جاری ایک ویڈیو میں وہ خفیہ جگہ دکھائی ہے جہاں کیبن کریو طویل پروازوں کے دوران آرام کرتے ہیں۔ ویڈیو میں دیکھا جا سکتا ہے کہ ایک فضائی میزبان طیارے کے اندر ایک خاص حصے میں داخل ہوتی ہے جہاں دو کیپسول نما بستروں کا انتظام موجود ہے، جنہیں پردے سے ڈھانپا جا سکتا ہے۔

اگرچہ جگہ تنگ اور بستر زیادہ آرام دہ نہیں لگتے، لیکن یہ عملے کو پرواز کے لمبے حصے میں سونے کا موقع دیتے ہیں۔ ان آرام گاہوں کو “کریو ریسٹ” کہا جاتا ہے اور انہیں خاص طور پر اس طرح تیار کیا جاتا ہے کہ عملہ اپنی شفٹ کے دوران مختصر وقفے میں پرسکون نیند لے سکے۔ ان میں قابلِ تنظیم روشنی، کمبل، سیفٹی بیلٹ اور علیحدہ وینٹیلیشن سسٹم شامل ہوتا ہے تاکہ عملے کا آرام محفوظ اور ممکن حد تک بہتر ہو۔

انتہائی طویل پروازوں میں ان آرام کے وقفوں کا شیڈول سخت پروٹوکول کے تحت ترتیب دیا جاتا ہے۔ کیبن مینیجرز اس بات کو یقینی بناتے ہیں کہ کچھ عملہ مسافروں کی خدمت کے لئے موجود رہے جبکہ باقی اپنے وقفے میں جا سکیں۔ اس نظام سے عملہ چوکس رہتا ہے اور ہنگامی حالات میں بہتر کارکردگی دکھا سکتا ہے۔

یہ حصے عام مسافروں کی نظر سے اوجھل رہتے ہیں۔ چوڑے باڈی والے طیاروں میں یہ آرام گاہیں اکثر اوپری حصے میں بنائی جاتی ہیں، جبکہ کچھ ماڈلز میں یہ پچھلے حصے میں ایک عام سی دروازے کے پیچھے چھپی ہوتی ہیں جس کا اندازہ عام مسافروں کو نہیں ہوتا۔

یہ ویڈیو اس بڑھتے ہوئے رجحان کا حصہ ہے جس کے تحت ایئر لائنز اور ان کا عملہ سوشل میڈیا پر اپنے روزمرہ کام کی جھلکیاں شیئر کر رہے ہیں تاکہ مسافروں کو پسِ پردہ چلنے والے نظام سے آگاہ کیا جا سکے اور فلائٹ کریو سے متعلق عام غلط فہمیاں دور کی جا سکیں۔