بارسلونا،پانچ برسوں میں میٹرو ٹرینوں سے گرافیتی صاف کرنے پر لاکھوں یورو خرچ،سب سے زیادہ میٹرو کی L1 اور L4 لائنیں متاثر

بارسلونا(دوست مانیٹرنگ ڈیسک) میٹرو میں بڑھتے ہوئے توڑ پھوڑ کے واقعات نے شہری انتظامیہ کو بڑے اخراجات پر مجبور کر دیا ہے۔ گزشتہ پانچ برسوں میں میٹرو ٹرینوں سے گرافیتی صاف کرنے پر تقریباً 60 لاکھ یورو خرچ ہو چکے ہیں، تاہم مشترکہ آپریشنز نے صورتحال میں نمایاں کمی لائی ہے۔

میٹرو انتظامیہ TMB کی صدر اور پہلی نائب میئر لایا بونیت کے مطابق 2020 کے مقابلے میں صفائی کا سالانہ خرچہ 75 فیصد کم ہوا ہے۔ یہ کمی پلان اینٹی گرافیتی کے تحت گواردیا اربانا اور موسوس دی اسکوادرا کی مشترکہ کارروائیوں سے ممکن ہوئی ہے۔ بونیت نے واضح کیا کہ شہر میں پبلک ٹرانسپورٹ پر وینڈلزم کے خلاف زیرو ٹالرنس کی پالیسی جاری رہے گی۔

خرچے اور تاخیر میں نمایاں کمی

2020 میں گرافیتی سے متاثرہ ٹرینوں کی تعداد 737 تھی، جن کی صفائی پر 22 لاکھ یورو خرچ ہوئے۔ 2024 میں یہ تعداد گھٹ کر 350 رہ گئی اور اخراجات کم ہو کر 7 لاکھ 30 ہزار یورو تک آگئے۔ صفائی کے باعث ہونے والی تاخیر بھی کم ہو کر 6 گھنٹے سے تقریباً 3 گھنٹے رہ گئی ہے۔

پولیس کی تیز تر کارروائی کے نتیجے میں گرافیتی کی مجموعی سطح میں بھی 80 فیصد کمی ریکارڈ کی گئی ہے، کیونکہ پینٹرز کو کام کرنے کے لیے پہلے جیسا وقت نہیں ملتا۔

L1 اور L4 سب سے زیادہ متاثر

بہتری کے باوجود، میٹرو کی L1 اور L4 لائنیں اب بھی سب سے زیادہ نشانہ بنتی ہیں۔ دونوں لائنوں پر متاثرہ ٹرینوں کو روٹ کے اختتام پر قائم خصوصی صفائی اسٹیشنوں پر منتقل کیا جاتا ہے۔

L1، جو کہ پورے نیٹ ورک کی سب سے زیادہ استعمال ہونے والی لائن ہے، کے ہسپتال دے بیلویتے اسٹیشن پر کار واش جیسے جدید نظام کے ساتھ ایک دستی صفائی یونٹ بھی موجود ہے۔ یہاں کارکن پہلے کیمیائی محلول لگاتے ہیں اور پھر گرم پانی کے پریشر سے گرافیتی ہٹاتے ہیں۔

ایک یا دو مربع میٹر صاف کرنے میں تقریباً 20 منٹ لگتے ہیں، جس کے باعث یہ عمل نہایت وقت طلب اور مہنگا ہے۔ صرف 2025 میں اس لائن پر گرافیتی صاف کرنے پر 4 لاکھ 18 ہزار یورو خرچ ہو چکے ہیں، یعنی ہر پینٹنگ پر اوسطاً 2 ہزار یورو۔