بارسلونا نے بھارتی سیاحوں کو متوجہ کرنے کے لیے بالی ووڈ کا سہارا لے لیا

بارسلونا کی میونسپلٹی نے بھارت کو ایک ’’پریمیئم‘‘ سیاحتی مارکیٹ قرار دیتے ہوئے ایسی حکمت عملی تیار کی ہے جس کے تحت بھارتی فلمی صنعت بالی ووڈ کی مدد سے زیادہ سے زیادہ بھارتی سیاحوں کو شہر کی طرف راغب کیا جائے گا۔ اس منصوبے کو Casa Asia کی معاونت بھی حاصل ہے اور اس کا مقصد دونوں خطوں کے درمیان اقتصادی، سائنسی اور ثقافتی تعلقات کو مضبوط کرنا ہے۔

شہری انتظامیہ کا مؤقف ہے کہ بھارتی سیاح بارسلونا کی ثقافتی زندگی میں ایک نئی اور مثبت رنگ آمیزی کرسکتے ہیں، اس لیے اس مارکیٹ کو خاص توجہ دی جا رہی ہے۔

بھارتی سیاحت کی بڑھتی ہوئی اہمیت

2024 میں 3 کروڑ 10 لاکھ سے زائد بھارتی شہریوں نے بیرون ملک سفر کیا، جس سے بھارت دنیا کے بڑے سیاحتی ممالک میں شمار ہونے لگا۔ اندازہ ہے کہ 2029 تک یہ تعداد 4 کروڑ 10 لاکھ سے تجاوز کر جائے گی۔ بارسلونا اپنی ثقافتی کشش، بہتر بنیادی ڈھانچے اور عالمی شہرت کی بدولت اس مارکیٹ کو اپنی جانب کھینچنے کے لیے خود کو ایک موزوں مقام سمجھتا ہے۔

میونسپل رپورٹ کے مطابق بھارتی سیاح شہر میں ’’تازگی اور ثقافتی ہم آہنگی‘‘ کا اضافہ کرتے ہیں، اور ان کی بڑھتی ہوئی آمد باہمی تجارتی اور ثقافتی تعلقات کو مزید مضبوط بنا سکتی ہے۔

بارسلونا سوئٹزرلینڈ کی طرز پر بالی ووڈ کا سہارا لینے پر غور کر رہا ہے۔ اس مقصد کے لیے نہ صرف بھارتی فلموں کی شوٹنگ کو شہر میں لانے کی کوشش کی جائے گی بلکہ بھارتی فلمی ستاروں کو ’’سیاحتی سفیر‘‘ کے طور پر استعمال کرنے کا بھی امکان زیر غور ہے۔

اس کے ساتھ ساتھ بالی ووڈ کے شائقین کے لیے خصوصی ٹورز اور دوروں کی تیاری بھی منصوبے کا حصہ ہے۔

بالی ووڈ کے علاوہ شہر انتظامیہ بھارتی کاروباری سیاحت اور ڈیسٹی نیشن ویڈنگز کو بھی اہم شعبے سمجھتی ہے۔ اسپین اور یورپ میں بھارتی کمپنیوں کی بڑھتی دلچسپی اور شادیوں پر بڑے اخراجات کے رجحان نے بارسلونا کے لیے اس مارکیٹ کی اہمیت مزید بڑھا دی ہے۔

حال ہی میں بھارتی ارب پتی خاندان کی ایک شاہانہ شادی کے سلسلے میں دس نجی طیاروں کی آمد اس رجحان کی واضح مثال ہے۔

یہ حکمت عملی اس وقت سامنے آئی ہے جب بارسلونا میں بھارت کا نیا جنرل قونصلیٹ قائم کیا گیا ہے۔ قونصلیٹ اب تورے الائنس کی 16ویں اور 17ویں منزل پر منتقل ہو چکا ہے اور 1968 کے بعد پہلی بار اسے اعزازی کی بجائے باضابطہ درجے کے ساتھ کام دیا گیا ہے۔

نئے قونصل جنرل انباسیکر سندر مورتی، جو بھارتی سفارتی سروس سے تعلق رکھتے ہیں، یہاں اپنی ذمہ داریاں سنبھال رہے ہیں۔

میونسپلٹی کو امید ہے کہ یہ تمام اقدامات مل کر بارسلونا کو بھارتی سیاحوں کے لیے یورپ کا ایک اہم دروازہ بنا دیں گے۔

About The Author