سڈنی حملہ: وزیرِاعظم پیدرو سانچیز کی شدید مذمت، یہود دشمنی اور دہشت گردی کے خاتمے پر زور

میڈرڈ(دوست مانیٹرنگ ڈیسک)اسپین کے وزیرِاعظم پیدرو سانچیز نے آسٹریلیا کے شہر سڈنی میں اتوار کے روز پیش آنے والے یہود مخالف دہشت گرد حملے کی شدید الفاظ میں مذمت کی ہے۔ حملہ سڈنی کی مشہور بونڈی بیچ پر ہوا جہاں یہودی تہوار حنوکہ کے آغاز کی تقریب ہونے والی تھی۔

آسٹریلوی پولیس کے مطابق فائرنگ کے اس واقعے میں کم از کم 11 افراد ہلاک اور 29 زخمی ہوئے۔ پولیس نے اسے ایک منظم دہشت گردانہ حملہ قرار دیا ہے جس کا ہدف تقریب میں شریک افراد تھے۔

پیدرو سانچیز نے سماجی رابطے کی ویب سائٹ ایکس پر انگریزی زبان میں جاری بیان میں کہا کہ اس حملے کی بھرپور مذمت کی جاتی ہے اور یہ کہ یہود دشمنی اور دہشت گردی کے مکمل خاتمے کے لیے مسلسل اور سنجیدہ کوششیں ضروری ہیں۔ ان کے مطابق ایسی سوچ اور ایسے اقدامات کی کسی بھی مہذب معاشرے میں کوئی گنجائش نہیں۔ وزیرِاعظم نے متاثرہ خاندانوں سے ہمدردی اور یکجہتی کا اظہار بھی کیا۔

پولیس کے مطابق حملہ کم از کم دو مسلح افراد نے کیا۔ پولیس کی جوابی کارروائی کے دوران ایک حملہ آور ہلاک ہو گیا جبکہ دوسرا شدید زخمی حالت میں گرفتار کر لیا گیا ہے۔

نیو ساؤتھ ویلز پولیس نے بتایا کہ واقعہ مقامی وقت کے مطابق شام 6 بج کر 45 منٹ پر پیش آیا جب دو مسلح افراد نے تقریب کے مقام کے قریب فائرنگ شروع کر دی، جو ساحل کے شمالی حصے میں منعقد ہونے والی تھی۔