تینیرائف میں ایک معمر خاتون سے ڈیڑھ لاکھ یورو سے زائد کی ہوشربا ٹھگی
تینیرائف میں ایک معمر خاتون سے ڈیڑھ لاکھ یورو سے زائد کی ہوشربا ٹھگی سامنے آئی ہے۔ جعلسازوں نے خود کو خاتون کا بیٹا ظاہر کیا، اعتماد جیتا اور پھر نقد رقم سے لے کر قیمتی زیورات تک سب کچھ لے اڑے۔ پولیس نے ایک نوجوان کو گرفتار کر لیا ہے، جبکہ نیٹ ورک کی تلاش جاری ہے۔
ایک فون کال، ایک جذباتی کہانی اور چند لمحوں میں زندگی بھر کی جمع پونجی لٹ گئی۔ سانتا کروز ڈی ٹینیرائف میں ایک بزرگ خاتون کو ’’مشکل میں بیٹے‘‘ کے طریقے سے نشانہ بنایا گیا۔
پہلی کال میں ایک شخص نے خود کو ان کا بیٹا بتایا۔ کہا کہ موبائل خراب ہو گیا ہے اور وہ شدید مشکل میں ہے۔ باتوں میں گھبراہٹ تھی، آواز میں اپنائیت۔ خاتون نے شک نہ کیا۔
کچھ ہی دیر بعد دوسرا فون آیا۔ اس بار خود کو بیٹے کا منیجر کہنے والے شخص نے فوری رقم کا مطالبہ کیا۔ خاتون نے 42 ہزار یورو نقد ایک لفافے میں دیے، جو ایک تیسرے شخص نے آ کر وصول کیے۔
یہیں بات ختم نہیں ہوئی۔ اگلے دنوں میں جعلسازوں نے مزید دباؤ ڈالا۔ بینک ٹرانسفرز، اے ٹی ایم سے رقم نکلوانا اور پھر قیمتی زیورات کا مطالبہ۔ خاتون نے آدھا کلو سے زائد زیورات دے دیے، جن کی مالیت ایک لاکھ یورو کے قریب تھی۔
جب مزید رقم مانگی گئی تو بینک کے عملے کو شک ہوا۔ انہوں نے خاتون کو خبردار کیا اور پولیس کو اطلاع دی۔
پولیس نے جال بچھایا اور ایک 18 سالہ نوجوان کو گرفتار کر لیا، جو اسی دن جزیرے پر آیا تھا اور چند گھنٹوں بعد واپس جانے والا تھا۔
ملزم کو عدالت نے الزامات کے ساتھ رہا کر دیا ہے، جبکہ پولیس اس گروہ کے دیگر ارکان تک پہنچنے کی کوشش کر رہی ہے۔ حکام کا کہنا ہے کہ اس قسم کی وارداتوں میں سب سے بڑا ہتھیار خوف اور جذبات ہوتے ہیں، اور بروقت شک ہی سب سے مؤثر دفاع ہے۔
About The Author
