:پیپلز پارٹی اسپین کے زیراہتمام محترمہ بینظیر بھٹو شہید کی 17ویں برسی کی تقریب

بارسلونا(دوست نیوز)پاکستان پیپلز پارٹی اسپین کے زیراہتمام اسلامک سنٹر منہاج القرآن بارسلونا میں محترمہ بینظیر بھٹو شہید کی ۱۷ وین برسی کے حوالہ سے تعزیتی تقریب کا اہتمام کیا گیا،تقریب نماز عصر سے بعد از نماز مغرب تک جاری رہی، قرآن خوانی کی گئی۔ہدیہ نعت پیش کیا گیا،

ڈاکٹر حافظ محمد موسیٰ نے تقریب کا آغاز تلاوت قرآن مجید سے کیا اور مفتی اعجاز قادری نے فلسفہ شہادت اور عورت کی عظمت کے حوالہ سے خطاب کیا۔انہوں نے محترمہ بینظیر بھٹو شہید کی شخصیت پر کہا کہ محترمہ منہاج القرآن کی لائف ٹائم ممبر تھیں۔ انہیں بھی یہ احساس تھا کہ میرے مرنے کے بعد میرے لئے کوئی دعا کرنے والا موجود ہونا چاہیئے۔ اور منہاج القرآن کی نسبت سے اپنی بخشش کا اہتمام کیا۔انہوں نے کہا کہ محترمہ قیامت کے دن اپنے رب سے پوچھیں گی کہ مجھے کیوں قتل کیا گیا۔ میرا کیا قصور تھا تو اس وقت قاتلوں کو کہٹرے میں لایا جائے گا۔

نماز مغرب کے بعد اجتماعی دعا کی گئی جس میں محترمہ بینظیر بھٹو شہید کی روح کے بلندی درجات کی دعا کی گئی۔ اور تمام شرکامیں لنگر تقسیم کیا گیا۔

صدرپی پی اسپین چوہدری اشتیاق حسین نائب صدرمیاں عبدالروف آرائیں،محمد اقبال چوہدری،سینئر نائب صدر یورپ چوہدری ساجد حسین گوندل،فیض اللہ ساہی،راجہ ساجد محمود نے محترمہ بینظیر بھٹو شہید کی شخصیت اور سیاسی جدوجہد پر خراج تحسین پیش کرتے ہوئے کہا محترمہ بے نظیر بھٹو پاکستان کی سیاسی تاریخ کی ایک ایسی شخصیت ہیں جنہوں نے نہ صرف پاکستان بلکہ دنیا بھر میں خواتین کی سیاسی قیادت کے حوالے سے ایک نئی تاریخ رقم کی۔

وہ ایک غیر معمولی خاتون تھیں جنہوں نے اپنی ذہانت، بہادری اور سیاسی بصیرت کے ذریعے پاکستان کے عوام کی خدمت کے لیے اپنی زندگی وقف کر دی۔ بے نظیر بھٹو پاکستان کی پہلی خاتون وزیر اعظم ہونے کے ساتھ ساتھ کسی بھی اسلامی ملک کی پہلی خاتون وزیر اعظم ہونے کا اعزاز بھی رکھتی ہیں۔

تقریب میں پاکستان پیپلز پارٹی اسپین کے کارکنان،عہدیداران کے علاوہ دیگر سیاسی جماعتوں کے نمائندگان اور اور پاکستانیوں کی بڑی تعداد میں شرکت کی، اور محترمہ بینظیر بھٹو شہید کی پاکستان کے لئے خدمات کو سراہا اور خراج تحسین پیش کیا۔