کام زیادہ ،تنخواہیں کم اساتذہ کا بارسلونا میں مظاہرہ

بارسلونا میں ہفتہ کے روز سینکڑوں اساتذہ نے بہتر تنخواہوں اور کام کے بڑھتے ہوئے بوجھ کے خلاف مظاہرہ کیا۔ یہ احتجاج شہر کے علاقے آرک دی ٹریومف سے شروع ہوا اور پلاسا کومیرسیال پر اختتام پذیر ہوا۔

مظاہرے میں USTEC، پروفیسرز دے سیکونداریا، CCOO، UGT اور CGT سمیت مختلف تعلیمی یونینز نے شرکت کی۔ یونینز نے محکمہ تعلیم پر الزام عائد کیا کہ وہ اساتذہ کی تنخواہوں میں اضافے سے متعلق اپنے وعدے پورے نہیں کر رہا۔

USTEC کی ترجمان ایولاندا سیگورا نے کہا کہ انتظامیہ پر دباؤ بڑھانے کے لیے احتجاجی سلسلہ جاری رکھا جائے گا۔ انہوں نے اساتذہ کو 11 فروری کو ہڑتال میں شرکت کی دعوت بھی دی۔

CCOO کی تعلیمی شعبے کی ترجمان ایستر ویلا نے کہا کہ مذاکرات بلاوجہ طول پکڑ رہے ہیں۔ ان کے مطابق 11 فروری کی ہڑتال ممکنہ طور پر مسلسل ہڑتالوں کے ایک سلسلے کا آغاز ہو سکتی ہے۔

ASPEPC-SPS یونین کے ترجمان راميرو گل نے کہا کہ کاتالونیا کے اساتذہ شدید ذہنی دباؤ کا شکار ہیں۔ انہوں نے وزیر تعلیم ایستر نیوبو پر تنقید کرتے ہوئے کہا کہ اساتذہ کے کام کے حالات ناقابل قبول اور استحصالی ہیں۔