عالیہ ریاض اور کمنٹیٹر علی یونس کی شادی کی ویڈیو منظر عام پر
پاکستان ویمن کرکٹ ٹیم کی آل راؤنڈر عالیہ ریاض اور سابق کپتان وقار یونس کے چھوٹے بھائی اور کمنٹیٹر علی یونس کی شادی کی ویڈیو اور تصاویر منظر عام پر آتے ہی سوشل میڈیا پر وائرل ہوگئیں۔
خیال رہے کہ عالیہ ریاض اور علی یونس کی شادی کی شاندار تقریب گزشتہ روز 12 اپریل کو لاہور کے ایک نجی فارم ہاؤس میں منعقد ہوئی، جس میں خصوصی قوالی نائٹ کا بھی اہتمام کیا گیا۔
سوشل میڈیا پر وائرل ویڈیو میں دیکھا جاسکتا ہے کہ عالیہ ریاض نے زندگی کے اس یاد گار اور پُرمسرت موقع پر ہلکے بھورے رنگ کی میکسی کا انتخاب کیا۔
دوسری جانب سابق کپتان وقار یونس کے چھوٹے بھائی اور کمنٹیٹر علی یونس سفید شلوار قمیض کے ساتھ اپنی دلہنیا سے میچنگ کرتے ہوئے ہلکے بھورے رنگ کے واسٹ کوٹ میں نظر آئے۔
پاکستانی خاتون کرکٹر اور کمنٹیٹر کی شادی کی اس تقریب میں دولہا اور دلہن کے دوست احباب اور عزیز و اقارب کے ساتھ ساتھ قومی کرکٹ ٹیم کے کھلاڑیوں نے بھرپور شرکت کرکے اس تقریب کو چار چاند لگا دیئے۔
تقریب میں دلہنیا کی طرف سے قومی ویمن کرکٹ ٹیم کی کپتان ندا ڈار، انعم امین، ارم جاوید، بسمہ معروف، سدرہ امین، عائشہ ظفر اور نتالیہ پرویز سمیت دیگر خواتین کرکٹرز نے شرکت کی۔
اس یادگار تقریب میں دولہا کے بڑے بھائی وقاریونس اور سابق کپتان محمد یوسف، مشتاق احمد، رمیز راجہ، انضمام الحق، مصباح الحق، عبدالرزاق موجودہ کپتان بابر اعظم، کامران اکمل، عمر اکمل، اظہر علی اور عمران نذیر سمیت متعدد کرکٹرز نے شرکت کی۔
سوشل میڈیا پر وائرل ویڈیوز میں دیکھا جاسکتا ہے کہ قوالی نائٹ کے اختتام پر قومی کرکٹرز نے دھمال بھی ڈالا۔
یاد رہے کہ اس سے قبل جوڑے کی رواں ماہ کے آغاز میں منگنی ہوئی تھی۔
واضح رہے کہ عالیہ ریاض پاکستان کی خواتین ٹیم کی ٹاپ آل راؤنڈر ہیں، وہ 62 ون ڈے انٹرنیشنل اور 83 ٹی ٹوئنٹی میچز میں پاکستان کی نمائندگی کر چکی ہیں۔
دوسری جانب علی یونس نامور کمنٹیٹر ہیں، وہ حال ہی میں پی ایس ایل 2024 کی کمنٹری ٹیم کا حصہ تھے۔
