بارسلونا(دوست نیوز)معروف قانون دان ماہر امیگریشن امور مہر وقاص،مہر افضال اور مہر جواد کے والد محترم مہر محمد شریف طاہر مرحوم جو گزشتہ دنوں پاکستان میں وفات پا گئے تھے ان کی روح کے ایصال ثواب کے لئے فیضان مدینہ اسلامک سنٹر بادالونا میں قرآن خوانی کی محفل کا انعقاد کیا گیا۔
محفل کا باقاعدہ آغاز تلاوت قرآن مجید اور نعت رسول مقبول ﷺسے ہوا،
نماز عصر کے بعد شروع ہونے والی محفل آذان مغرب تک جاری رہی۔نگران ناردرن اسپین حاجی محمد امجد عطاری نے والدین کی عزت واحترام اور حقوق پر مبنی قرآن وحدیث کی روشنی میں مفصل بیان کیا۔انہوں نے موجودہ دور میں نوجوان نسل کی جانب سے والدین کے احترام کو ملحوظ خاطر نہ رکھنے کو موضوع بنایا اور بتایا کہ اکثر والدین مجھے بتاتے ہیں کہ میرا بیٹا میری عزت نہیں کرتا احترام نہیں کرتا تو میں انہیں بتا دینا چاہتا ہوں کہ جس کا والد ناراض ہے اس سے اس کا اللہ بھی ناراض ہے۔جنت میں وہی جائے گا جس کے والدین اپنے اولاد سے راضی ہونگے۔والدین میں سے جو بھی آپ کے پاس ہے اس کی خدمت کریں بہت جلد یہ خدمت کا موقع واپس لے لیا جائے گا اور پھر روتے رہ جاؤ گے۔والدین کے وفات پاجانے کے بعد ان کے کون سے حقوق ہیں جن کو ادا کرنا چاہئیے اس پر تفصیل سے روشنی ڈالی۔
والدین اگر بڑھاپے میں ہیں تو انہیں اف تک نہ کہو، صبر تحمل سے کام لیں اور ان کی خدمت میں ماتھے پر شکن تک نہیں آنی چاہئیے۔ماتھے پر شکن بھی اللہ کو ناراض کرسکتی ہے۔
انہوں نے کہا کہ میں خود والد ہوں لیکن آج بھی اپنے والد کی کمی محسوس کرتا ہوں ان کی قبر ہر جاتا ہوں تو ان سے گفتگو کرتا ہوں لیکن میں ان کی آواز نہیں سن سکتا۔والدین کی کمی ایک طرف ان کا دیا حوصلہ اور دعا آپ کے لئے کامیابی کی راہ ہوتے ہیں آپ مشکل میں ہوں تو ان کا دلاسہ آپ کی مشکلات کو کم کردیتا ہے۔
عالمی مبلغ قرآن صدارتی ایوارڈ یافتہ قاری سید صداقت علی شاہ کے مسجد آنے پر مہر وقاص اور مہر افضال نے استقبال کیا۔قاری صداقت علی شاہ نے ختم پاک پڑھا اور دعا کرائی
ایصال ثواب کی محفل میں ویلفئیر قونصل چوہدری سالک حسین گوندل سمیت پاکستانی کمیونٹی کی ایک بڑی تعداد نے شرکت کی،اور مہر وقاص،مہر افضال اور مہر جواد سے دعا میں شریک افراد نے تعزیت کی اور دعا کرتے ہوئے کہا کہ اللہ سبحانہ تعالی مرحوم کو جنت الفردوس اور لواحقین کو صبر جمیل عطا فرمائے آمین
مہر وقاص،مہر افضال اور مہر جواد نے تمام شرکاء محفل کا شکریہ ادا کرتے ہوئے کہا کہ آپ لوگوں نے دکھ کی اس گھڑی میں جس طرح ساتھ دیا حوصلہ بڑھایا ہم اور ہمارا خاندان تمام دوست احباب کا شکریہ ادا کرتا ہے۔ہم امید کرتے ہیں کہ آپ ہمیں اپنی دعاؤں میں یاد رکھیں گے۔
