ائیر لائینز کو بیگوں پر اضافی فیس نہیں لگنی چاہیے تھی۔عدالتی فیصلہ

بارسلونا(دوست نیوز) رائین ایئر کے مسافر نے 2019 سے 2024 کے دوران پانچ پروازوں پر چارج کیے گئے ہینڈ لگیج کے اخراجات کی واپسی کا مقدمہ جیت لیا

رائین ایئر کو ایک مسافر کو £124 (یعنی €147) واپس کرنے کا حکم دیا گیا ہے کیونکہ عدالت نے فیصلہ دیا کہ ہینڈ لگیج ایک لازمی چیز ہے اور اس پر اضافی فیس نہیں لگنی چاہیے۔

یہ کامیابی ہوائی سفر کرنے والوں کے لیے ایک بڑی جیت قرار دی جا رہی ہے۔ اسپین کے شہر سالامنکا کی عدالت نے حکم دیا کہ مسافر کو ان پانچ پروازوں کے لیے ہینڈ لگیج کی فیس واپس کی جائے جو انہوں نے 2019 اور 2024 کے درمیان کی تھیں۔

عدالت کا کہنا تھا کہ ان بیگز پر اضافی فیس لگنا نہیں چاہیے تھی۔جج نے اپنے فیصلے کی بنیاد ایک 2014 کے یورپی یونین عدالت کے فیصلے پر رکھی، جس میں کہا گیا تھا کہ ہینڈ لگیج “بنیادی طور پر مسافر کی نقل و حمل کا لازمی جزو ہے اور اس کی منتقلی پر اضافی قیمت لاگو نہیں کی جا سکتی”۔

یہ مقدمہ ہسپانوی صارفین کے حقوق کی تنظیم “فاکوا” (Facua) نے سپورٹ کیا تھا۔

اسپین کے ایئر نیویگیشن قانون کے آرٹیکل 97 کے مطابق، ایئرلائنز “مسافر کے ساتھ ساتھ، بغیر کسی اضافی چارج کے، ان کے ساتھ موجود اشیاء اور ہینڈ لگیج کو بھی لے جانے کی پابند ہیں”۔

ہسپانوی وکیل آئزاک گویخارو نے اس فیصلے کو “دنیا بھر کے مسافروں کے لیے ایک بڑی جیت” قرار دیا۔

انہوں نے مزید کہا: “یہ فیصلہ ظاہر کرتا ہے کہ رائین ایئر مسافروں کو چلتے پھرتے ATM کی طرح نہیں سمجھ سکتا۔”

انہوں نے وضاحت کی“وہ صرف سیکیورٹی وجوہات کی بنا پر، یا وزن و سائز کی حدود کی وجہ سے کسی سامان کو سوار ہونے سے روک سکتے ہیں، لیکن اس کیس میں یہ عام کیبن سوٹ کیس تھے جن کا سائز 55x35x25 سینٹی میٹر سے زیادہ نہیں تھا،”

رائین ایئر کی ویب سائٹ کے مطابق، کمپنی کی پالیسی یہ ہے کہ ہر مسافر کو ایک مفت چھوٹا بیگ لے جانے کی اجازت ہوتی ہے جو “سامنے والی سیٹ کے نیچے فٹ آ سکے”۔ یہ بیگ ہینڈ بیگ، لیپ ٹاپ بیگ یا بیک پیک ہو سکتا ہے، جس کا زیادہ سے زیادہ سائز 40x20x25 سینٹی میٹر ہونا چاہیے۔ اس سے بڑے سامان کے لیے اضافی چارج لیا جاتا ہے۔

تاہم، اس کیس میں مسافر — اور ہسپانوی قانون — کا ماننا تھا کہ ایک عام سائز کا وہیل والا ہینڈ لگیج بیگ جس کا سائز 55x35x25 سینٹی میٹر ہو، اسے اجازت ہونی چاہیے۔

اس فیصلے نے سوالات کھڑے کر دیے ہیں کہ آیا ایئرلائنز کو اپنی پالیسیاں تبدیل کرنی ہوں گی تاکہ تمام معیاری سائز کے کیبن بیگ کی اجازت دی جا سکے۔

رائین ایئر کے ترجمان نے بتایا:“رائین ایئر ہر مسافر کو ایک مناسب سائز (40x25x20 سینٹی میٹر) کا ذاتی بیگ مفت لے جانے کی اجازت دیتا ہے، جبکہ اضافی بیگز کی سہولت اختیاری فیس کے ساتھ دستیاب ہے۔”