بارسلونا میں بارشوں اور طوفانی موسم کی پیش گوئی، کل کا دن سب سے نازک قرار

بارسلونا (دوست نیوز) بارسلونا اور اس کے گردونواح میں آئندہ دنوں کے دوران شدید بارشوں اور طوفانی موسم کی پیش گوئی کی گئی ہے۔ محکمہ موسمیات Eltiempo.es کے مطابق پری پیری نیو (Prepirineo) کے علاقوں میں بارہ گھنٹوں کے دوران بارش 80 ملی میٹر تک ریکارڈ کی جا سکتی ہے۔

منگل 9 ستمبر ہفتے کا سب سے نازک دن ہوگا۔ بارش کی شرح امکان 90 فیصد تک پہنچ گئی ہے، جبکہ 10.4 ملی میٹر تک بارش ریکارڈ ہونے کا امکان ظاہر کیا گیا ہے۔ درجہ حرارت نسبتاً کم رہے گا، کم از کم 21 اور زیادہ سے زیادہ 22 ڈگری سینٹی گریڈ۔ ہوا مشرقی سمت سے 11 کلومیٹر فی گھنٹہ کی رفتار سے چلے گی، جب کہ زیادہ سے زیادہ جھکڑ 17 کلومیٹر فی گھنٹہ تک ریکارڈ ہو سکتے ہیں۔ ہوا میں نمی کی سطح 84 فیصد تک بڑھ جائے گی۔

بدھ 10 ستمبر کو صورتحال میں بہتری کا امکان ہے۔ بارش کا امکان 40 فیصد تک گر جائے گا اور مقدار انتہائی کم (0.2 ملی میٹر) ہوگی۔ موسم میں جزوی دھوپ نکلے گی، درجہ حرارت بڑھ کر زیادہ سے زیادہ 26 ڈگری سینٹی گریڈ تک پہنچے گا اور نمی کم ہو کر 73 فیصد رہنے کی توقع ہے۔

انتظامیہ نے شہریوں کو ہدایت دی ہے کہ بارش کے شدید اوقات میں غیر ضروری سفر سے گریز کریں، بالخصوص ان علاقوں میں جو سیلاب سے متاثر ہو سکتے ہیں۔ مزید برآں شہریوں کو تاکید کی گئی ہے کہ وہ سرکاری ذرائع سے موسمی صورتحال پر نظر رکھیں اور پیشگی حفاظتی اقدامات اختیار کریں تاکہ ممکنہ نقصانات سے بچا جا سکے۔