اے ایم بی کا پبلک بائیسکل سروس سے روشناس کرانے کے لیے خصوصی پروموشن کا اعلان

بارسلونا (دوست نیوز) ایریا میترو پولیتانا دی بارسلونا (AMB) نے شہریوں کو پبلک بائیسکل سروس سے روشناس کرانے کے لیے خصوصی پروموشن کا اعلان کیا ہے۔ 16 سے 23 ستمبر تک “یورپی ویک آف سسٹین ایبل موبلٹی” کے موقع پر AMBici بائیسکلیں تین روز کے لیے بالکل مفت دستیاب ہوں گی۔

یہ سہولت پہلے 5,000 صارفین کے لیے ہوگی جو موبائل ایپ پر پروموشنل کوڈ SEM25 درج کریں گے۔ رجسٹریشن کی تصدیق کے لیے صرف ایک سینٹ (یورو) کی علامتی ادائیگی کرنا ہوگی۔

عام دنوں میں اس سروس کی سالانہ فیس 20 یورو ہے جو فی الحال رعایتی طور پر 10 یورو وصول کی جا رہی ہے۔

AMB کے نائب صدر برائے ٹرانسپورٹ و سسٹین ایبلٹی کارلوس کاردون نے کہا کہ اس اقدام کا مقصد شہریوں کو نجی گاڑی کے بجائے سائیکل کے استعمال کی طرف راغب کرنا اور صحت مند و ماحول دوست آمدورفت کو فروغ دینا ہے۔

AMBici نیٹ ورک کے تحت میٹروپولیٹن بارسلونا کے کئی قصبات میں روایتی اور برقی بائیسکلز فراہم کی جاتی ہیں، جو پبلک ٹرانسپورٹ کے ساتھ جڑ کر آلودگی میں کمی اور سفر میں سہولت کا باعث بن رہی ہیں۔ ادارے کے مطابق حالیہ مہینوں میں اس سروس کے استعمال میں نمایاں اضافہ ہوا ہے۔