حارث روف تیسری بار پی ایس ایل چیمپئن کا ٹائٹل جیتنے کےلیے پرعزم
پاکستان سپر لیگ (پی ایس ایل) فرنچائز لاہور قلندرز کے فاسٹ بولر حارث رؤف نے تیسری بار چیمپئن کا ٹائٹل جیتنے کے عزم کا اظہار کردیا۔
لاہور میں میڈیا سے گفتگو حارث رؤف نے کہا کہ پی ایس ایل میں لگاتار دو بار چیمپئن بن چکے ہیں، اس سال بھی فینز کی امیدیں ہوں گی کہ ٹائٹل جیتیں۔
انہوں نے کہا کہ گزشتہ سال کی طرح اس سال بھی اچھی پرفارمنس دینے کی کوشش کریں گے، پریشر کوئی نہیں ہے۔
لاہور قلندرز کے فاسٹ بولرز نے مزید کہا کہ فینز کو بہترین کھیل سے اینٹرٹین کرنے کی کوشش کریں گے، پرفارمنسز میں اتار چڑھاؤ آتا رہتا ہے، اسی سے ہم سیکھتے ہیں۔
اُن کا کہنا تھا کہ کوشش ہے جو غلطیاں کیں، ان سے جلدی سے جلدی سیکھوں، ردھم میں کمی نہیں ہے، پریکٹس سیشن میں اپنی غلطیوں پر کام کروں گا۔
حارث رؤف نے یہ بھی کہا کہ شاہین آفریدی کے ساتھ کافی عرصے سے کھیل رہا ہوں، وہ اپنی ٹیم کے لیے فائٹ کرتے ہیں۔
انہوں نے کہا کہ پی ایس ایل ہو یا نیشنل ٹیم شاہین آفریدی کی کوشش ہوتی ہے کہ اپنی ٹیم کو ریلیکس رکھے، لیفٹ آرم فاسٹ بولر نے ہمیشہ اپنی ٹیم کے کھلاڑیوں کو بیک کیا ہے۔
لاہور قلندرز کے فاسٹ بولر نے کہا کہ بگ بیش لیگ کے بعد نیوزی لینڈ سیریز کھیلی ہے، میرے اوپر کوئی پریشر نہیں ہے۔
اُن کا کہنا تھا کہ پی ایس ایل میں ہائی اسٹینڈرڈ کرکٹ ہوتی ہے، یہاں جو لڑکے پرفارم کرتے ہیں وہ نیشنل ٹیم کے لیے زیر غور لائے جاتے ہیں۔
حارث رؤف نے کہا کہ کوشش کروں گا کہ اپنی پرفارمنس بہتر کروں اور ٹیم میں جگہ پکی کروں۔
