انتخابات میں مبینہ دھاندلی کا الزام، وائٹ ہاؤس کا پھر اظہار تشویش

پاکستان کے انتخابات میں مبینہ دھاندلی کے الزامات پر وائٹ ہاؤس نے پھر اظہار تشویش کیا ہے۔

ترجمان امریکی نیشنل سیکیورٹی کونسل جان کربی نے کہا ہے کہ رپورٹس میں سنا ہے کہ ڈرانے، دھمکانے، ووٹرز کو دبانے، اس قسم کی چیزیں ہیں۔

انہوں نے کہا کہ ہم اسے بہت قریب سے دیکھ رہے ہیں، بین الاقوامی مانیٹر بھی دیکھ رہے ہیں۔

دوسری جانب بانی پی ٹی آئی نے پاکستان کے انتخابات میں مبینہ دھاندلی پر آواز اٹھانے کے لیے امریکا سے مطالبہ کیا ہے۔

بانی پی ٹی آئی سے ملاقات کے بعد پی ٹی آئی کے رہنما بیرسٹر سیف کا کہنا تھا بانی پی ٹی آئی نے پیغام دیا ہے کہ امریکا کے پاس موقع ہے، اپنی غلطیوں کا ازالہ کرے۔

انہوں نے کہا کہ کاسمیٹک بیانات نہیں چلیں گے، انتخابات پر جس طرح امریکا کو آواز بلند کرنی چاہیے اس طرح اُس نے نہیں کی ہے۔