فلسطین کے لیے فنکاروں کی آواز: کاتالونیا میں دو ماہ پر مشتمل خیراتی کنسرٹس کا اعلان

سو سے زائد فنکاروں کی شرکت، تمام آمدنی غزہ کے انسانی و ثقافتی منصوبوں کے لیے وقف

بارسلونا (دوست نیوز)سماجی و ثقافتی تنظیم “ایکٹ فار فلسطین” (Act x Palestine) نے اعلان کیا ہے کہ وہ 15 نومبر سے 23 دسمبر تک کاتالونیا کے مختلف شہروں میں تقریباً پندرہ خیراتی کنسرٹس کا اہتمام کرے گی۔ ان تقریبات میں سو سے زائد فنکار اور موسیقی سے وابستہ افراد فلسطین کے حق میں اظہارِ یکجہتی کریں گے۔

یہ کنسرٹس خیرونا، سولسونا، برگا، ویلا سار دے دالت اور بارسلونا سمیت مختلف شہروں میں ہوں گے۔

شریک فنکاروں میں جودت نیدرمن، لیدیا پوجول، ایل پونی پِسادور، گیلیم رُوما، پاؤ فِگیراس، ماریا کوما، وِک مولینر اور کارولا اورتیز جیسے مشہور نام شامل ہیں۔

مہم کا اختتام 23 دسمبر کو بارسلونا کے مشہور کنسرٹ ہال “سالا رَزمتاز” میں ایک خصوصی کرسمس کنسرٹ سے ہوگا، جس میں ایلز امِکس دے لس آرتس، فیگا فلاواس، لا فومیگا، ماریا جاؤمے، مشکا، سو، دی تائتس اور ڈی جے تراپیلا پرفارم کریں گے۔

منتظمین کے مطابق، تمام آمدنی فلسطینی تنظیموں کو عطیہ کی جائے گی جو غزہ میں انسانی امداد اور تعمیرِ نو کے منصوبوں پر کام کر رہی ہیں۔ ان کا کہنا ہے کہ یہ اقدام “اس بےحسی کے خلاف جدوجہد ہے جس نے نسل کشی، نسلی امتیاز اور قبضے کو ممکن بنایا۔”

“ایکٹ فار فلسطین” نے اسے ثقافتی برادری کی اجتماعی یکجہتی کا مظہر قرار دیا ہے اور دیگر فنکاروں، پروڈیوسرز اور کنسرٹ مقامات کو بھی مہم میں شامل ہونے کی دعوت دی ہے۔

بیان کے مطابق، یہ کنسرٹس “فن اور سماجی ذمہ داری کے درمیان تعلق کو اجاگر کرنے کی کوشش” ہیں۔

ٹکٹوں کی فروخت 23 اکتوبر دوپہر 12 بجے سے شروع ہو چکی ہے۔

گزشتہ ہفتے تنظیم نے اعلان کیا تھا کہ کاتالونیا اور فلسطین کی قومی فٹبال ٹیمیں 18 نومبر کو بارسلونا کے اولمپک اسٹیڈیم میں ایک دوستانہ میچ کھیلیں گی۔

اس سے قبل 14 اور 15 نومبر کو بارسلونا میں “ان سائلنس فورم” منعقد ہوگا، جس میں دنیا بھر کی بڑی فلسطینی تنظیموں کے نمائندے شریک ہوں گے۔

مزید برآں، 29 جنوری کو پالاؤ سانت جوردی میں ایک بڑا کنسرٹ بھی منعقد کیا جائے گا۔

About The Author