کاتالونیا میں رواں سال کے دوران سڑک حادثات،کتنے لوگ جان سے گئے اور زخمیوں کی کیا تعداد ہے؟رپورٹ جاری

بارسلونا: کاتالونیا میں رواں سال کے دوران سڑک حادثات میں 121 افراد جان کی بازی ہار چکے ہیں، جو گزشتہ سال کے مقابلے میں چھ زیادہ ہیں۔ محکمۂ ٹریفک (Servei Català de Trànsit) کے مطابق یکم جنوری سے 31 اکتوبر 2025 تک صوبے کی شاہراہوں پر 113 مہلک حادثات پیش آئے، جن میں 121 افراد ہلاک ہوئے۔

رپورٹ کے مطابق صرف اکتوبر میں نو افراد سڑک حادثات میں ہلاک ہوئے، جو گزشتہ سال کے اسی مہینے میں ہونے والی 15 اموات سے چھ کم ہیں۔ اگر 2019 کے اعداد و شمار سے موازنہ کیا جائے تو مجموعی طور پر ٹریفک حادثات میں 22 فیصد کمی دیکھی گئی ہے۔

اعداد و شمار کے مطابق ہلاک ہونے والوں میں 95 مرد اور 26 خواتین شامل ہیں، جب کہ شدید زخمیوں کی تعداد 725 تک جا پہنچی ہے، جو پچھلے سال کے مقابلے میں کچھ زیادہ ہے۔

محکمے نے بتایا کہ ہلاک ہونے والوں میں سے 44.6 فیصد کا تعلق کمزور طبقوں سے ہے، جن میں 37 موٹر سائیکل سوار، 12 پیدل چلنے والے اور 5 سائیکل سوار شامل ہیں۔ اگرچہ موٹر سائیکل حادثات میں مرنے والوں کی تعداد گزشتہ سال کے مقابلے میں سات کم ہوئی ہے، لیکن یہ اب بھی مجموعی اموات کا 30 فیصد بنتی ہے۔ پیدل چلنے والوں کی اموات میں تین کا اضافہ دیکھا گیا ہے۔

محکمہ ٹریفک نے موٹر سائیکل سواروں، پیدل چلنے والوں اور سائیکل سواروں سے زیادہ احتیاط برتنے اور خطرے کے ادراک کی اپیل کی ہے، جب کہ دیگر ڈرائیوروں کو محتاط رہنے اور احترام کا مظاہرہ کرنے کی ہدایت دی ہے۔

حادثات کی نوعیت کے لحاظ سے 37 سادہ حادثات، 30 سامنے سے تصادم، 18 پہلو سے ٹکر، 10 پچھلے حصے سے لگنے والے حادثے اور 12 افراد کے کچلے جانے کے واقعات شامل ہیں۔ سب سے زیادہ اموات والی شاہراہوں میں AP-7 (13 اموات)، C-58 (9)، N-II (8) اور A-2 (7) شامل ہیں۔

عمر کے لحاظ سے سب سے زیادہ متاثرہ طبقہ 25 سے 34 سال کے درمیان کا ہے، جس میں 25 افراد ہلاک ہوئے۔ مجموعی طور پر 35 سال سے کم عمر 47 نوجوان اپنی جانیں گنوا چکے ہیں، جو گزشتہ سال کے مقابلے میں 15 زیادہ ہیں۔ ان میں 15 سے 24 سال کے 20 نوجوان، 25 سے 34 سال کے 25 اور 14 سال سے کم عمر کے دو بچے شامل ہیں۔

ہفتے کے دنوں کے اعتبار سے 56 اموات عام دنوں میں جبکہ 65 ہفتہ وار تعطیل یا تہوار کے دوران ہوئیں۔

ضلع وار تفصیل کے مطابق، بارسلونا میں 53، جرونا میں 18، تارراگونا میں 26 اور لیریدا میں 24 اموات ہوئیں۔ بارسلونا میں سب سے زیادہ موٹر سائیکل سوار ہلاک ہوئے۔

محکمے کے مطابق، اگرچہ حادثات مختلف سڑکوں پر تقسیم ہیں، لیکن نوجوانوں اور موٹر سائیکل سواروں میں بڑھتی ہوئی شرح تشویش ناک ہے، اور حفاظتی اقدامات پر سختی سے عمل درآمد ضروری ہے۔