لامین یامل اسپین کی نمائندگی نہیں کریں گے، فیڈریشن کی بارسلونا پر شدید برہمی

میڈرڈ (دوست مانیٹرنگ ڈیسک)اسپین کی فٹبال فیڈریشن اور ایف سی بارسلونا کے درمیان ایک نیا تنازع سامنے آیا ہے، جب نوجوان اسٹار لامین یامل کو جارجیا اور ترکی کے خلاف میچوں سے دستبردار کر لیا گیا۔ فیڈریشن نے ایک سخت بیان میں بارسلونا کے رویے پر سخت ناراضگی ظاہر کی ہے۔

فیڈریشن کے مطابق بارسلونا کے میڈیکل اسٹاف نے پیر کی صبح کھلاڑی کو پبالجیا کے علاج کے لیے “ریڈیو فریکوئنسی کے ذریعے ایک تکلیف دہ اور مداخلت آمیز عمل” سے گزارا، اور یہ سب بغیر اطلاع دیے کیا گیا۔ بعد میں جب یامل میڈرڈ پہنچے تو فیڈریشن کو بارسلونا کی جانب سے موصول رپورٹ میں کھلاڑی کو 7 سے 10 دن کے آرام کا مشورہ دیا گیا تھا۔

اطلاعات کے مطابق لامین یامل نے اتوار کی رات ویگو میں تقریباً پورا میچ کھیلا۔ اگلی صبح علاج کرایا گیا، اور فیڈریشن کو اس کی اطلاع دوپہر 1 بج کر 47 منٹ پر ملی۔ شام کو کھلاڑی میڈرڈ روانہ ہوئے اور رات کو ٹیم کے ساتھ موجود تھے، مگر رات 10 بج کر 40 منٹ پر فیڈریشن کے ڈاکٹروں کو علاج کی تفصیلات اور آرام کی ہدایت والا خط موصول ہوا۔ طویل مشاورت اور کشیدگی کے بعد منگل کی صبح کھلاڑی کو واپس بارسلونا بھیجنے کا فیصلہ کیا گیا۔

فیڈریشن کے بیان میں کہا گیا، “کھلاڑی کی صحت اور سلامتی کو اولین ترجیح دیتے ہوئے، ہم نے لامین یامل کو موجودہ کیمپ سے آزاد کرنے کا فیصلہ کیا ہے۔ ہم ان کی جلد اور مکمل صحت یابی کے خواہاں ہیں۔”

یہ تنازع دراصل ستمبر میں شروع ہوا تھا جب یامل زخمی ہوئے تھے۔ اُس وقت بھی بارسلونا اور فیڈریشن کے درمیان علاج کے طریقے پر اختلاف سامنے آیا تھا۔ بارسلونا کے کوچ ہانس فلیک نے اس وقت فیڈریشن پر الزام لگایا تھا کہ کھلاڑی کو “صحیح طریقے سے نہیں سنبھالا گیا”۔

یہ تازہ ترین واقعہ دونوں اداروں کے تعلقات میں مزید تناؤ پیدا کر سکتا ہے۔ اگر اسپین آئندہ عالمی کپ کے لیے کوالیفائی کرنے میں ناکام رہا تو یہ معاملہ ایک بار پھر موضوعِ بحث بننے کا امکان ہے۔