اجلاس سے سنی اتحاد کونسل کا واک آؤٹ، منانے کیلئے کمیٹی قائم

پنجاب میں وزارتِ اعلیٰ کے انتخابی دنگل کے سلسلے میں اسمبلی اجلاس 30 منٹ کی تاخیر سے شروع ہو گیا۔

پنجاب اسمبلی کے اجلاس کی صدارت اسپیکر ملک محمد احمد خان کر رہے ہیں۔

ن لیگ اور اتحادیوں کی پنجاب کی وزارتِ اعلیٰ کی امیدوار مریم نواز کی جیت یقینی ہے۔

سنی اتحاد کونسل کے امیدوار رانا آفتاب مریم نواز کے مدِ مقابل ہیں۔

بڑی تعداد میں ن لیگی و اتحادی اور سنی اتحاد کونسل کے اراکین ایوان میں موجود ہیں۔

انتخابی عمل کیلئے گھنٹی بجانے کی ہدایت

اسپیکر پنجاب اسمبلی ملک محمد احمد خان نے انتخابی عمل کی کارروائی کے لیے گھنٹی بجانے کی ہدایت کی۔

سنی اتحاد کونسل کا واک آؤٹ

رانا آفتاب احمد خان نے پوائنٹ آف آرڈر پر بولنے کی اجازت طلب کی جس پر اسپیکر ملک محمد احمد خان نے رانا آفتاب کو بولنے سے منع کر دیا۔

اسپیکر پنجاب اسمبلی ملک محمد احمد خان نے کہا کہ آج کے اجلاس میں صرف وزیرِ اعلیٰ کا چناؤ ہونا ہے، آپ آج کے اجلاس میں نہیں بول سکتے۔

اس موقع پر سنی اتحاد کونسل کے ارکانِ اسمبلی نے بات کرنے کی اجازت نہ دینے پر احتجاج کرتے ہوئے واک آؤٹ کیا ہے۔

پنجاب اسمبلی میں اراکین کا شور شرابہ

سنی اتحاد کونسل کے ارکان احتجاج کے بعد باہر روانہ ہوئے تو پنجاب اسمبلی میں اراکین کا شور شرابہ دیکھنے میں آیا۔

ارکانِ سنی اتحاد کونسل کا کہنا ہے کہ جب تک پوائنٹ آف آرڈر پر بات کرنے کی اجازت نہیں دی جائے گی ایوان میں نہیں آئیں گے۔

اسپیکر پنجاب اسمبلی ملک محمد احمد خان نے ہدایت کی کہ گیلریز میں نظم و ضبط قائم رکھیں۔

ہاریں یا جیتیں مقابلہ کریں: مریم نواز

اس موقع پر مریم نواز نے کہا کہ اپوزیشن ارکان بائیکاٹ نہ کریں، اٹھ کر نہ جائیں، ہاریں یا جیتیں، مقابلہ کریں، یہی جمہوریت کا حسن ہے۔

سنی اتحاد کو منانے کیلئے 4 رکنی کمیٹی قائم

اسپیکر پنجاب اسمبلی ملک محمد احمد خان نے کہا کہ میں نے ایوان کو آئین کے مطابق چلانا ہے، آج کے دن پوائنٹ آف آرڈر نہیں ہو گا، کوئی لفظ بھی کارروائی کا حصہ نہیں ہو سکتا۔

اسپیکر پنجاب اسمبلی ملک محمد احمد خان نے سنی اتحاد کونسل کو منانے کے لیے 4 رکنی کمیٹی بنا دی۔

اسپیکر نے سنی اتحاد کونسل کے ارکان کو منانے کے لیے کمیٹی کو ٹاسک دے دیا۔

کمیٹی میں شامل خلیل طاہر، عمران نذیر، سلمان رفیق اور سمیع اللّٰہ کو ارکان کو منانے کے لیے بھیج دیاگیا۔

کمیٹی کے ارکان کے ساتھ سہیل شوکت اور علی گیلانی کو بھی ناراض ارکانِ اسمبلی کو منانے کےلیے بھیجا گیا ہے۔

مزید 2 نو منتخب ارکان نے حلف اٹھا لیا

پنجاب اسمبلی کے اجلاس کے دوران مزید 2 نو منتخب ارکانِ اسمبلی خضر حسین مزاری اور طاہر قیصرانی نے حلف اٹھا لیا۔

اسپیکر پنجاب اسمبلی ملک محمد احمد خان نے ان سے حلف لیا۔

آج ایوان اپوزیشن کو پیغام دے گا: مریم نواز

وزیرِ اعلیٰ پنجاب کے لیے ن لیگ کی امیدوار مریم نواز بھی پنجاب اسمبلی پہنچ گئیں۔

اس موقع پر مریم نواز نے ’جیو نیوز‘ سے خصوصی گفتگو کرتے ہوئے کہا کہ ابھی کچھ دیر بعد ایوان میں فیصلہ ہو گا، آج ایوان اپوزیشن کو پیغام دے گا۔

اسمبلی آمد سے قبل مریم آبائی قبرستان گئیں

نامزد وزیرِ اعلیٰ پنجاب مریم نواز پنجاب اسمبلی روانگی سے پہلے جاتی امراء میں آبائی قبرستان گئیں، جہاں انہوں نے دادا، دادی اور والدہ کی قبروں پر قرآن خوانی کی اور پھول بھی رکھے ۔

مسلم لیگ ن کے رہنما رانا ثناء اللّٰہ بھی پنجاب اسمبلی پہنچ گئے۔

ووٹنگ ہو گی تو میں وزیرِ اعلیٰ بنوں گا: رانا آفتاب

اسی سلسلے میں سنی اتحاد کونسل کے وزیرِ اعلیٰ کے امیدوار رانا آفتاب بھی پنجاب اسمبلی پہنچ گئے۔

سنی اتحاد کونسل کے وزیرِ اعلیٰ کے امیدوار رانا آفتاب احمد خان کا کہنا ہے کہ ہماری پاس اچھی تعداد ہے، سرپرائز دیں گے، اگر ووٹنگ ہو گی تو میں وزیرِ اعلیٰ بنوں گا۔