آریان خان کی ڈیبیو ویب سیریز میں کئی نامور بالی ووڈ شخصیات کی خصوصی انٹری متوقع
بالی ووڈ کنگ شاہ رخ خان کے بڑے بیٹے آریان خان بطور ہدایتکار فلم انڈسٹری میں قدم رکھنے کے لیے تیار ہیں۔
بھارتی میڈیا کی رپورٹ کے مطابق، آریان خان مشہور اسٹریمنگ پلیٹ فارم نیٹ فلکس کے لیے لکھی گئی ویب سیریز ’اسٹارڈم‘ کی ہدایتکاری کریں گے جوکہ چھ اقساط پر مشتمل ہوگی۔
رپورٹ میں بتایا گیا ہے کہ اس ویب سیریز کی کہانی ان مشکلات اور چیلنجز کے گرد گھومتی ہے جن کا سامنا ان تمام نوجوان اداکاروں کو کرنا پڑتا ہے جو شوبز انڈسٹری میں اپنی منفرد پہچان بنانے اور شہرت کے حصول کی خواہش رکھتے ہیں۔
رپورٹ میں دعویٰ کیا گیا ہے کہ اس ویب سیریز میں اداکار لکشیا لالوانی اور اداکارہ مونا سنگھ مرکزی کردار ادا کرتے نظر آئیں گے۔
رپورٹ میں یہ دعویٰ بھی کیا گیا ہے کہ اس ویب سیریز میں شاہ رخ خان، کرن جوہر، بوبی دیول، رنبیر کپور اور رنویر سنگھ کی خصوصی انٹری بھی شامل ہے۔
یہاں یہ بات قابلِ ذکر ہے کہ اس سے قبل بھارتی میڈیا پر یہ خبر بھی سامنے آئی تھی کہ شاہ رخ خان اپنے بیٹے آریان خان کی ویب سیریز میں خصوصی انٹری دینے کے لیے بہت پُرجوش اور بے چین ہیں لیکن آریان خان اپنا کیریئر بنانے کے لیے اپنے والد کے نام کا فائدہ نہیں اُٹھانا چاہتے اس لیے یہ ممکن ہے کہ شاہ رخ خان ویب سیریز’اسٹار ڈم‘ کا حصّہ نہ بنیں۔
واضح رہے کہ ویب سیریز ’اسٹار ڈم‘ کی اسکرپٹ بھی آریان خان نے لکھی ہے اور اسے شاہ رخ خان کے پرودکشن ہاؤس ریڈ چلیز کے بینر تلے ریلیز کیا جائے گا۔
