آصف زرداری دوسری مرتبہ منتخب ہونے والے پہلے سویلین صدر ہوں گے، بلاول بھٹو

چیئرمین پاکستان پیپلز پارٹی بلاول بھٹو زرداری نے کہا ہے کہ آصف زرداری دوسری مرتبہ منتخب ہونے والے پہلے سویلین صدر ہوں گے۔

وزیر اعظم شہباز شریف کی جانب سے دیے گئے عشائیہ سے خطاب کرتے ہوئے بلاول بھٹو زرداری کا کہنا تھا کہ ہم سب نے مل کر صدر پاکستان کے اختیار کو ختم کیا تھا۔

انہوں نے کہا کہ آصف زرداری سے کہا اس بار آپ ایسے صدر ہوں گے جیسے کوئن آف انگلینڈ۔ کسی سویلین کو دوسری بار صدر منتخب ہونے کا اعزاز ملے گا۔

انہوں نے کہا کہ پارلیمنٹ کو اختیارات کی واپسی کا اعزاز بھی آصف زرداری کو حاصل ہوا، میرے والد آصف زرداری ہمارے مشترکہ صدارتی امیدوار ہیں، امید ہے وہ بطور صدر مملکت وفاق کو مضبوط کریں گے۔

بلاول بھٹو زرداری نے کہا کہ آصف زرداری جب کامیاب ہوں گے تو تاریخ میں پہلی بار کسی سویلین نے دوبارہ یہ عہدہ سنبھالا ہوگا، پچھلی بار جب آصف زرداری صدر بنے تب تاریخ میں سب سے طاقتور سویلین صدر تھے۔

چیئرمین پی پی پی نے کہا کہ ہم نے 18ویں ترمیم کرکے صدر پاکستان کے تمام اختیارات پارلیمنٹ کو دیے تھے۔