میں نے اپنی غلطیوں سے سبق سیکھا ہے، اُسامہ میر

پاکستان سپر لیگ (پی ایس ایل) 9 کے لیڈنگ وکٹ ٹیکر اُسامہ میر نے کہا ہے کہ میں نے اپنی غلطیوں سے سبق سیکھا ہے۔

ملتان سلطانز کے بولر اسامہ میر نے جیو سے گفتگو میں کہا کہ ماضی میں خراب پرفارمنس کی وجہ سے کافی مایوس تھا، میں نے اپنی غلطیوں سے سبق سیکھا۔

انہوں نے کہا کہ ون ڈے آیا تو سلو گیند کرانے کی کوشش میں ایکشن تبدیل کردیا، پہلے مجھے اندازہ نہیں ہوا کہ کیا غلطیاں کر رہا تھا۔

اُسامہ میر نے مزید کہا کہ بعد میں احساس ہوا کہ میرا ایکشن مکمل نہیں ہو رہا تھا، اب تک کی 18 وکٹوں میں سے بہترین وکٹ بابر اعظم کی تھی۔

ملتان سلطانز کے بولر نے یہ بھی کہا کہ جس طرح بابر کھیلتے ہیں لگتا ہے وہ کسی سے آؤٹ نہیں ہوں گے، دو بار فائنل میں ناکام ہوئے اس بار ضرور چیمپئن بنیں گے۔