زردای کے صدر منتخب ہونے پر جیالوں کا جشن
پیپلز پارٹی پارلیمنٹیرنز کے صدر آصف علی زردای کے صدر منتخب ہونے کی خوشی میں پیپلز پارٹی کے جیالوں نے جشن منایا، بھنگڑے ڈالے، آتش بازی کا مظاہرہ کیا۔
آصف علی زردای کے صدر منتخب ہونے کے اعلان کے ساتھ ہی پنجاب اسمبلی کے سامنے اور چیئرنگ کراس پر جیالے جمع ہوگئے، جئے بھٹو اور آصف زردای سب پر بھاری کے نعرے لگائے۔
پرجوش جیالوں نے پارٹی گیتوں پر خوب رقص کیا، پاکستان پیپلز پارٹی کے رہنما چوہدری منشاء نے ساتھیوں کے ہمراہ داتا دربار حاضری دی۔
چیئرنگ کراس پر پی پی پی کارکنوں نے زبردست آتش بازی کی۔
پی پی پی رہنما سید حسن مرتضٰی نے کہا کہ پاکستان کی تاریخ میں آصف علی زردای کا دوسری بار صدر مملکت منتخب ہونا پیپلز پارٹی کے لیے فخر کی بات ہے۔
سید حسن مرتضٰی نے کارکنوں سے خطاب میں کہا کہ آئین اور قانون کی بالادستی کے لیے ایوان صدر کو استعمال کیا جائے گا۔
انہوں نے کہا کہ آج اسی بلوچستان نے جہاں محمود اچکزئی قوم پرستی کی سیاست کرتے تھے انہیں مسترد کردیا ہے، آج تمام اکائیوں کو اکٹھا کرنا اور سب کو ساتھ لیکر چلنے کا وقت ہے۔
اس موقع پر خواتین کارکنوں نے بھی پنجاب اسمبلی کے احاطے میں آصف علی زرداری اور بھٹو کے حق میں نعرے بازی کی۔
