پاک فیڈریشن ایگزیکٹو کونسل کا ماہانہ اجلاس،فیڈریشن کے انتخابات کرانے پر مشاورت
بارسلونا(پ ر)پاک فیڈریشن ایگزیکٹو کونسل کا ماہانہ اجلاس جمعہ کی شام بارسلونا میں منعقد ہوا جس کی صدارت فیڈریشن کے صدر چوہدری ثاقب طاہر نے کی۔ صدر نے ایگزیٹو کونسل کو آگاہ کیاکہ ان کی صدارت کی مدت پوری ہونے والی ہے لہذا کونسل نئے صدر کے انتخابات کے اقدامات کرے اور سپریم کونسل کا اجلاس بھی بلایا جائے تا کہ پچھلے تین ماہ کے فیصلوں کی توثیق بھی ہو سکے اور الیکشن کا انعقاد بھی جلد کیا جا سکے۔
صدر نے ایگزیٹو کونسل کو یہ بھی بتایا کہ اس وقت تک تیس (30) مختلف ایسو سی ایشنز، پاک فیڈریشن کی ممبرز ہیں جبکہ 133افراد بھی فیڈریشن کی ڈائریکٹ ممبر شپ رکھتے ہیں۔ ایسو سی ایشنز میں سے اکثریت متحرک ہیں لیکن چند ایک کام نہیں کر رہیں اور باقی کام کر رہی ہیں جبکہ کچھ مزید افراد نے ممبر بننے کی استدعا کر رکھی ہے جن کے نام ایگزیکٹو کونسل کے سامنے منظوری کے لیے رکھ دیے گئے ہیں۔ 17 دسمبر بروز اتوار الیکشن کی تاریخ بھی طے کی گئی جس کے لیے جگہ اور ٹائم بارے تمام ممبران کو پہلے سے تحریری طور پر مطلع کیا جائے گا۔
اجلاس میں ووٹر کے حق کو بھی واضع کیا گیا اور بتایا گیا کہ آئین کے مطابق پاک فیڈریشن کی ممبرز ایسو سی ایشنز اور فیڈریشن کے ڈائرکٹ ممبر افراد ہی ووٹ ڈال سکتے ہیں کیونکہ کہ یہ کوئی ریفرنڈم نہیں ہوتا کہ ہر بندے کی رائے لی جائے اور نہ ہی ایسا ممکن ہے۔ ہر ایسو ایشن کو دو ووٹ کا حق ہوتا ہے جبکہ فیڈریشن کے انفرادی ممبران صرف ایک ووٹ ڈالنے کے اہل ہیں۔ موجودہ آئین کے حوالے سے وضاحت کیا گیا کہ 2018 سے پہلے کئی سال تک فیڈریشن کا فنگشن معطل رہا اور جس مقصد کے لیے یہ ادارہ بنایا گیا تھا وہ کام مزید آگے نہ بڑھ سکا۔ 2018 میں الیکشن اور دوبارہ فنگشنل ہونے پر سپریم کونسل نے دستور میں تبدیلی کی منظوری دی کہ جو افراد فلاحی کام میں متحرک رہتے ہیں اور کمیونٹی کے لیے کام کرنے کا جذبہ رکھتے ہیں، انھیں ڈائریکٹ فیڈریشن کا ممبر بنایا جائے تا کہ فیڈریشن کے فورم سے فلاحی کاموں میں تیزی لائی جا سکے۔ پھر اسی ترمیم شدہ دستور کے مطابق فیڈریشن کے اندر ڈائرکٹ ممبرشپ دی گئی اور کونسلز کی تشکیل عمل میں لائی گئی تا کہ ان افراد کو مکمل طور پر ذمہ دار بنا کر اپنے اپنے شعبے کا ازادانہ کام کرنے کا موقع فراہم کیا جائے۔ موجودہ وقت میں خواتین کی دو کونسلز سمیت ایک درجن کے قریب کونسلز میں یہی افراد ہیں جن کو دستور میں تبدیلی کے بعد ڈائریکٹ ممبرشپ دی گئی اور وہ بہترین طریقے سے اپنے فرائض منصبی سر انجام دے رہے۔ ائندہ بھی اگر کوئی ایسو سی ایشن یا فرد فیڈریشن کا ممبر بننا چاہیں وہ دستور کے مطابق بن سکتے ہیں اور اپنا ووٹ ڈال سکتے ہیں اور الیکشن میں حصہ لینا چاہیں تو بھی لے سکتے ہیں کوئی پابندی نہیں۔
انتخابات کو شفاف بنانے، 17 دسمبر کو ہونے والے الیکشن کے لیے سفارشات اور فیڈریشن کے آئین کے مطابق طریقہ کار طے کرنے کے لیے سات ممبران پر مشتمل ایک کمیٹی بنا دی گئی ہے جو ایک ہفتہ کے اندر سفارشات مرتب کر کے ایگزیکٹو کونسل کو بھجوائے گی تاکہ اسپیکر سپریم کونسل کا اجلاس بلا سکے اور نئے صدر کے لیے ووٹنگ ہو سکے۔ کمیٹی درج ذیل افراد پر مشتمل ہے راجہ بشارت، شفیق تبسم، چوہدری ایاز مٹھانہ، مظہر حسین راجہ، چوہدری شہباز کھٹانہ، سید ذوالقرنین شاہ اور راجہ بابر ناصر۔
اجلاس میں وقفہ کے دوران مذہبی امور کونسل کے چیئرمین راجہ ساجد محمود کی سالگرہ کا کیک بھی کاٹا گیا اور انہیں مبارکباد پیش کی گئی۔
اخوت کے چیئرمین جناب امجد ثاقب بھی 21 جنوری 2024 کو بارسلونا تشریف لا رہے ہیں، معزز مہمان کو خوش آمدید کہنے اور ان کی اسپین کے سفر پر سیلاب کے دوران لکھی کی گئی کتاب کی تقریب رونمائی پر بھی غور کیا گیا جس میں انہوں نے اہل اسپین کے جذبہ حب الوطنی، انسانی ہمدردی کو خراج تحسین پیش کیا ہے اور قرطبہ مسجد کے سفر کو بھی بہترین الفاظ میں قلم بند کیا ہے اور ان کا یہ سپین کا سفر نامہ پڑھنے کے قابل ہے۔
