پاک فیڈریشن کی سوشل ویلفئیرکونسل کا اجلاس، "پاک سوشل ویلفئیر فنڈز” کا قیام

بارسلونا(پ ر)خواتین و حضرات کی فنی تعلیم اور ہنر مندی کے لیے قرضہ حسنہ کی فراہمی کا اغاز اور "پاک سوشل ویلفئیر فنڈز” کا قیام تا کہ لوگ ہنر سیکھ کر باعزت روزگار کمائیں۔

سوشل ویلفیئر کونسل کا آن لائن اجلاس مورخہ 22 مارچ 2025 کو منعقد ہوا جس کی صدارت کونسل کے چیئرمین راجہ شفیق کیانی نے کی۔ رمضان المبارک کے مہینہ میں مخیر حضرات و افراد کی طرف سے زر تعاون کی مکمل تفصیلات سے کونسل کو اگاہ کیا گیا اور رمضان پیکج کی خریداری اور ضررت مندوں تک ترسیلات کا طریقہ کار بھی بتایا گیا۔ ویلفیئر کونسل کے چیئرمین نے زرتعاون کرنے والے افراد کا شکریہ ادا کیا اور کونسل کے ممبران کی کوششوں کو بھی سراہا جنہوں نے اپنا قیمتی وقت نکال کر رمضان پیکج کی خریداری اور ترسیلات میں معاونت کی۔

مورخہ 23 مارچ 2025 پاکستان کے یوم ازادی کے موقع پر سپین میں بسنے والی پاکستانی کمیونٹی کی فلاح و بہبود کے لیے ایک نیا آئیڈیا اپلائی کیا جا رہا ہے اور "پاک سوشل ویلفیئر فنڈ” قائم کر دیا گیا ہے اور مالی طور پر پریشان خواتین و حضرات جو اپنا من پسند فنی کورس کرنا چاہیں انھیں قرض حسنہ دیا جائے گا تاکہ وہ ہنر سیکھیں، باعزت روزگار کمائیں، مالی پریشانی سے بچیں اور جلد اپنے پاؤں پر کھڑے ہو جائیں اور جب با روزگار ہو جائیں تو قرضہء حسنہ اسان اقساط میں ویلفیئر کونسل کو واپس کر دیں۔ قرضہ حسنہ دینے اور واپس لینے کا اسان طریقہ کار بنا دیا جائے گا۔

ماضی بعید و قریب میں ویلفیئر کے کاموں کے دوران کونسل کے ممبران نے دیکھا کہ اکثریتی پاکستانی لوگ ہنر مند نہیں ہوتے جس وجہ سے بے روزگار رہتے ہیں اور پریشان رہتے ہیں اور وہ کام اس لیے نہیں سیکھ سکتے کہ مالی وسائل نہیں ہوتے جبکہ سپین کی لیبر مارکیٹ میں ہنر مندوں کی بہت کمی ہے۔ اس لیے قرضہ حسنہ فنڈ کا قیام عمل میں لایا گیا ہے تا کہ لوگ اس سے فائدہ اٹھائیں اور اپنی فیملی کے لیے باعزت روزگار کمائیں۔ کونسل کے چیئرمین راجہ شفیق کیانی نے بتایا کہ قرضہ حسنہ فنڈ کے قیام کے علاوہ ضرورت مندوں کی مالی معاونت جاری رہے گی۔ اخر میں انھوں نے دوبارہ زر تعاون کرنے والوں کا شکریہ ادا کرتے ہوئے کہا کہ آپ کی دی ہوئی رقم پوری تحقیق کے بعد مستحقین کو پہنچائی جاتی ہے اور اس کا پورا حساب رکھا جاتا ہے۔

شعبہ نشر و اشاعت

پاک فیڈریشن سپین۔

22 مارچ 2025