دھند کے باعث اسلام آباد ایئرپورٹ کا فلائٹ شیڈول متاثر، متعدد پروازیں منسوخ

دھند کے باعث اسلام آباد ایئرپورٹ کا فلائٹ شیڈول متاثر ہوگیا، متعدد پروازیں منسوخ ہوگئیں، 2 پروازیں متبادل ایئرپورٹس پر منتقل کردی گئیں۔

ایئرپورٹ حکام کا کہنا ہے کہ دبئی سے اسلام آباد پی آئی اے کی پرواز پی کے 234  کراچی اتار لی گئی، پی آئی اے کی العین سے اسلام آباد پرواز پی کے 144 پشاور اتاری گئی ہے۔

پی آئی اے کی اسلام آباد سے دوحہ پرواز پی کے 287 منسوخ کردی گئی، جبکہ قومی ایئرلائن  کی اسلام آباد سے دبئی کی پرواز پی کے 233 منسوخ  کردی گئی ہے۔

ایئرپورٹ حکام کا کہنا ہے کہ ابوظبی، مسقط اور شارجہ سے اسلام آباد کی پروازیں بھی منسوخ ہوگئیں، اسلام آباد سے کوئٹہ کےلیے نجی پرواز ای آر 540، 541 منسوخ کردی گئیں۔

اسلام آباد سے گلگت کے لیے پی کے 601، 602 بھی منسوخ ہوگئیں، کراچی سے اسلام آباد کےلیے پرواز ای آر 504  منسوخ کردی گئی، کراچی سے لاہور اور پشاور کےلیے پروازیں بھی منسوخ ہوگئیں۔

ایئرپورٹ حکام کا کہنا ہے کہ مسافر ایئرپورٹ آمد سے قبل ایئرلائن سے رہنمائی ضرور لیں۔