Screenshot
برطانوی اخبار ڈیلی میل نے اسپین کی شہزادی اور ولی عہد لیونور کی تعریف کرتے ہوئے کہا ہے کہ وہ یورپ کی مستقبل کی ملکہوں کے لیے ایک نئی مثال قائم کر رہی ہیں۔ اخبار نے شہزادی لیونور کے یونیورسٹی میں پہلے دن کو خصوصی رپورٹ کا موضوع بنایا اور ان کے سادہ طرزِ زندگی اور عام طالبہ کی طرح تعلیم حاصل کرنے کے فیصلے کو سراہا۔
رپورٹ کے مطابق شہزادی لیونور نے میڈرڈ کی کارلوس تھری یونیورسٹی میں اپنی اعلیٰ تعلیم کا آغاز کیا ہے، جہاں وہ سیاسیات (Political Science) میں ڈگری حاصل کریں گی۔ ڈیلی میل نے اپنے مضمون میں لکھا کہ لیونور اس بات پر زور دے کر کہ انہیں بھی ایک ’’عام یونیورسٹی طالبہ‘‘ کی طرح سمجھا جائے، مثال کے ذریعے قیادت کر رہی ہیں۔
اخبار نے شہزادی کو ایک سادہ مزاج خاتون قرار دیتے ہوئے ان کی چھوٹی بہن انفانتا صوفیہ کے انداز کو بھی سراہا۔ رپورٹ میں کہا گیا کہ ہسپانوی شاہی خاندان میں اہم کردار رکھنے کے باوجود لیونور اور صوفیہ دونوں کو ان کے والدین، بادشاہ فلپ ششم اور ملکہ لیتیزیا نے جان بوجھ کر میڈیا کی غیر ضروری توجہ سے دور رکھا، جبکہ ان کی تعلیم پر خصوصی توجہ دی گئی۔
ڈیلی میل نے لیونور اور صوفیہ کا موازنہ یورپ کی دیگر شاہی شخصیات سے بھی کیا، جن میں نیدرلینڈز کی شہزادی کیتھرینا امالیا اور ڈنمارک کی شہزادی ازابیلا شامل ہیں۔ اخبار کے مطابق ان شاہی شہزادیوں کو گزشتہ برسوں کے دوران مختلف عوامی تقریبات میں زیادہ باقاعدگی سے دیکھا گیا ہے۔
رپورٹ میں لیونور اور صوفیہ کی سادگی کو ان کی والدہ ملکہ لیتیزیا کے پس منظر سے بھی جوڑا گیا ہے۔ ڈیلی میل نے یاد دلایا کہ لیتیزیا 1878 کے بعد اسپین میں پیدا ہونے والی پہلی ملکۂ مادر اور ایک عام شہری خاندان سے تعلق رکھنے والی پہلی ہسپانوی ملکہ ہیں۔
