پی پی نے 16 ہزار سڑکیں بنائیں، فلائی اوورز اور انڈر پاس بنوائے، میئر کراچی

میئر کراچی بیریسٹر مرتضٰی وہاب نے کہا ہے کہ پیپلز پارٹی نے 16 ہزار سڑکیں بنائیں، کئی فلائی اوورز اور انڈر پاس بنوائے ہیں۔

گورنر سندھ اور ایم کیوایم کو جواب دیتے ہوئے مرتضٰی وہاب نے کہا کہ سندھ انسٹی ٹیوٹ آف چائلڈ ہیلتھ کا 100 بیڈ پر مشتمل اسپتال سندھ حکومت نے فعال کیا، کورنگی میں آٹزم سینٹر تعمیر کیا۔

ان کا مزید کہنا تھا کہ ملک کا سب سے بڑا کارڈیک کیئر اسپتال کورنگی میں بننے جارہا ہے، ذوالفقار علی بھٹو انسٹی ٹیوٹ آف کارڈیو ویسکولر ڈیزیز اسپتال کا سنگ بنیاد بلاول بھٹو نے رکھا، درجنوں پارک بھی پیپلز پارٹی کی سندھ حکومت نے بنائے۔

دوسری جانب ناصرحسین شاہ نے کہا کہ پندرہ سال میں پیپلز پارٹی کا سندھ کو کچھ نہ دینے کا بیانیہ منافقت پر مبنی ہے، سندھ کے عوام کا ذہن بڑی سے بڑی سازش بھی نہیں بدل سکتی۔