پاکستان نے سوئٹزرلینڈ کو 1-10 سے ہرا دیا

فائیو اے سائیڈ ہاکی ورلڈ کپ میں پاکستان نے سوئٹزرلینڈ کو ایک کے مقابلے میں 10 گول سے ہرا کر نویں پوزیشن حاصل کرلی۔

مسقط میں پاکستان کی جانب سے زکریا حیات نے ہیٹ ٹرک کی جبکہ رانا وحید، حنان شاہد اور ارشد لیاقت نے دو دو گول کیے۔

پاکستان کے رانا وحید نے ایونٹ میں سب سے زیادہ 23 گول کیے۔ پاکستان کو ایف آئی ایچ کی جانب سے چیلنجرز ٹرافی بھی دی گئی۔

اس سے قبل فائیو سائیڈ ہاکی ورلڈ کپ سے باہر ہونے والی پاکستان ہاکی ٹیم نے راؤنڈ میچ میں آسٹریلیا کو 3-11 سے شکست دی تھی۔

اس میچ میں کپتان رانا عبدالوحید اشرف نے ہیٹ ٹرک سمیت 5 گول کیے تھے جبکہ غضنفر علی، ذکریا حیات نے دو اور مرتضیٰ یعقوب اور ارشد لیاقت نے ایک ایک گول اسکور کیا تھا۔

واضح رہے کہ فائیو اے سائیڈ ورلڈ کپ میں 16 ٹیموں نے شرکت کی تھی۔