میڈرڈ سٹی کونسل نے بچوں کی پیدائش یا گود لینے پر مالی امداد کی اسکیم 2026-2027 کا اعلان کر دیا ہے، جس کے تحت اہل خاندانوں کو ایک مرتبہ 500، 750 یا 1,000 یورو دیے جائیں گے۔ امداد کی رقم کا تعین خاندان میں بچوں کی تعداد کے مطابق کیا جائے گا۔ یہ اسکیم یکم ستمبر 2026 سے 31 دسمبر 2027 کے درمیان پیدا ہونے والے یا گود لیے جانے والے بچوں کے لیے ہے۔
میڈرڈ سٹی کونسل کے مطابق درخواست دینے کے لیے سب سے اہم شرط یہ ہے کہ والدین یا متعلقہ درخواست گزار بچے کی پیدائش یا گود لینے سے قبل مسلسل پانچ سال تک میڈرڈ شہر میں رجسٹرڈ رہائش (ایمپادرونامینتو) رکھتا ہو۔
اہم شرائط
اس امداد کے لیے اسپین کے شہریوں کے علاوہ قانونی طور پر اسپین میں مقیم غیر ملکی بھی درخواست دے سکتے ہیں۔ بچے کی پیدائش یا گود لینے کی تاریخ یکم ستمبر 2026 یا اس کے بعد ہونی چاہیے۔ گود لیے جانے والے بچے کی عمر پانچ سال تک ہو سکتی ہے۔
درخواست گزار کو والدین کے اختیارات سے محروم نہیں ہونا چاہیے، نہ ہی بچے کی سرپرستی کسی سرکاری ادارے کے پاس ہونی چاہیے۔ اس کے علاوہ، متعلقہ شخص کو ایسے جرم میں حتمی عدالتی سزا یافتہ نہیں ہونا چاہیے جو کسی ایسے فرد کے خلاف کیا گیا ہو جس کے ساتھ اس کا جذباتی تعلق رہا ہو۔
اس اسکیم میں آمدنی کی کوئی حد مقرر نہیں کی گئی۔ مزید برآں، بلدیہ نے اس امداد کے لیے ٹیکس حکام اور سوشل سکیورٹی کے واجبات کی ادائیگی کی شرط سے بھی استثنا دیا ہے۔
درخواست کیسے دیں؟
درخواست میڈرڈ سٹی کونسل کی ویب سائٹ sede.madrid.es کے ذریعے آن لائن یا بلدیہ کے رجسٹریشن دفاتر میں ذاتی طور پر جمع کرائی جا سکتی ہے۔ درخواست والدین میں سے کوئی ایک، قانونی سرپرست یا ان کا مجاز نمائندہ جمع کرا سکتا ہے۔
عام طور پر درخواست بچے کی پیدائش یا گود لینے کے بعد دو ماہ کے اندر دینی ہوگی۔ یکم ستمبر 2026 سے درخواستوں کے آغاز تک پیدا ہونے والے بچوں کے لیے یہ مدت اعلان کی اشاعت کے اگلے دن سے شروع ہوگی۔
درخواست میں بچے کی تفصیلات، خاندان میں اس کی ترتیب اور بینک اکاؤنٹ کا IBAN دینا ضروری ہے۔ مزید معلومات کے لیے میڈرڈ میں 010 یا شہر سے باہر 914 800 010 پر رابطہ کیا جا سکتا ہے۔
