اہم پلیئرز کے نہ ہونے سے فرق پڑتا ہے، عاقب جاوید
لاہور قلندرز کے ہیڈ کوچ عاقب جاوید نے کہا ہے کہ اہم پلیئرز کے نہ ہونے سے فرق پڑتا ہے، دوسرے کھلاڑیوں پر بوجھ بڑھ جاتا ہے۔
لاہور میں میڈیا سے گفتگو کرتے ہوئے عاقب جاوید کا کہنا تھا کہ بیٹنگ پچز پر رنز ہی بنتے ہیں، میچ میں دونوں ٹیمیں رنز کر رہی ہیں۔
انکا کہنا تھا کہ اس مرتبہ دونوں ٹیموں کےلیے یکساں کنڈیشنز ہیں، ایسا نہیں ہے کہ پہلے یا بعد میں کھیلنے والی ٹیم کو فائدہ ہو۔
عاقب جاوید نے کہا کہ رنز بن رہے ہیں اس لیے ٹیمیں ایک دوسرے کو چیلنج کر رہی ہیں۔ حارث رؤف جیسے بولرز بہت کم ہیں وہ لاہور قلندرز، پاکستان کے بولنگ کا ستون ہیں۔
لاہور قلندرز کے ہیڈ کوچ کا کہنا تھا کہ حارث رؤف کی کمی تو محسوس ہوگی وہ مضبوط انداز سے واپس آئیں گے۔ اہم پلیئرز کے نہ ہونے سے فرق پڑتا ہے، دوسرے کھلاڑیوں پر بوجھ بڑھ جاتا ہے۔
عاقب جاوید نے کہا کہ لاہور قلندرز ممکن اور ناممکن تمام صورتحال سے گزرنے کی تاریخ رکھتی ہے۔ اب بھی ناممکن کو ممکن کرسکتے ہیں اگر 5 ہارے ہیں تو 5 میچز جیت بھی سکتے ہیں۔
انکا کہنا تھا کہ ہم کلوز میچز ہار رہے ہیں، ہم 50، 60 رنز کے مارجن سے نہیں ہار رہے۔ ایک بال یا ایک اوور کی بات ہے۔
عاقب جاوید نے کہا کہ رائٹ لیفٹ کمبی نیشن بنانے کی وجہ سے بیٹنگ آرڈر اوپر نیچے کیا، پلاننگ کبھی حق میں جاتی ہے اور کبھی خلاف چلی جاتی ہے۔
انہوں نے کہا کہ راشد خان کا کوئی متبادل نہیں ہے، ہم ہار کر بھی جیتے ہیں اور جیت کر بھی ہارے ہیں۔
انکا کہنا تھا کہ کھلاڑیوں کو سب سبق یاد ہیں کھلاڑیوں کا مورال بلند ہے کم بیک کریں گے، فخر زمان کلاس کا بیٹر ہے وہ پی ایس ایل کے ٹاپ بیٹرز میں شامل ہوتے ہیں۔
عاقب جاوید نے کہا کہ فخر زمان میچ ونر ہیں، جلد کم بیک کریں گے۔
