یونان میں پاکستانی نے ہم وطن کو معمولی جھگڑے پر قتل کردیا

ایتھنز(ڈیلی دوست آن لائن ) یونان میں ایک پاکستانی نے محض سونے کی جگہ پر ہونے والے جھگڑے پر دوسرے پاکستانی کو تیز دھار آلے سے قتل کر دیا۔
عالمی خبر رساں ادارے کے مطابق یونان کے علاقے میکونوز میں انجم یوسف نامی شخص کو اس کے ہم وطن نے قتل کردیا۔ پولیس نے تحقیقات کا آغاز کردیا تاہم اب تک کوئی گرفتاری عمل میں نہیں لائی گئی۔پولیس کا کہنا ہے کہ قاتل اور مقتول کا تعلق ایک ہی ملک سے ہے اور دنوں محنت مزدوری کے لئے آئے تھے اور ایک ہی ساتھ رہتے تھے۔ کسی بات پر دونوں کے درمیان جھگڑا ہوا تھا۔ادھر گوجرانوالہ کے رہائشی خرم نے میڈیا کو بتایا کہ یونان میں قتل ہونے والا انجم یوسف میرا بھائی تھا اور 6 سال قبل یونان گیا تھا۔ جہاں اس کا سیالکوٹ سے تعلق رکھنے والے ایک شخص سے معمولی بات پر جھگڑا ہوا تھا۔بھائی خرم نے مزید بتایا کہ ملزم نے جھگڑے کے بعد اپنے ساتھیوں کے ساتھ مل کر بھائی پر حملہ کردیا اور تیز دھار چاقو لگنے سے میرے بھائی کی موت واقعی ہوگئی۔
خرم نے پاکستانی سفارت خانے سے بھائی کی لاش واپس لانے اور مجرمان کو سزا دلوانے کے لئے قانونی مدد کرنے کی درخواست کی۔