کاغدات مسترد ہونے کیخلاف پرویز الہٰی، شوکت بسرا، صنم جاوید کی اپیل، وکلاء کو تیاری کی مہلت
سپریم کورٹ آف پاکستان نے سابق وزیرِ اعلیٰ پنجاب و پی ٹی آئی رہنما چوہدری پرویز الہٰی، شوکت بسرا اور صنم جاوید کے کاغذاتِ نامزدگی مستردہونے پر فریقین کے وکلاء کو 11 بجے تک کی مہلت دے دی۔
تینوں رہنماؤں کی اپیلوں پر سماعت 11 بجے ہو گی۔
چوہدری پرویز الہٰی کی درخواست پر جسٹس منصور علی شاہ کی سربراہی میں 3 رکنی بینچ کرے گا۔
جسٹس جمال مندوخیل اور جسٹس اطہر من اللّٰہ بینچ میں شامل ہیں۔
دورانِ سماعت پرویز الہٰی کے وکیل فیصل صدیقی عدالت میں پیش ہوئے جنہوں نے کہا کہ معلوم ہے کہ انتخابات کے لیے بیلٹ پیپرز چھپنا شروع ہو چکے ہیں۔
عدالت نے کیس میں فریقین کو دلائل کی تیاری کے لیے 11 بجے کا وقت دے دیا۔
مخالف فریقین نے استدعا کی کہ عدالت کیس کی تیاری کے لیے2 دن کا وقت دے۔
جسٹس جمال مندوخیل نے کہا کہ آپ آج ہی تیاری نہیں کریں گے تو پرویز الہٰی کو انتخابات لڑنےکی اجازت دے کر 1 ماہ بعد کیس مقرر کریں گے۔
شوکت بسرا، صنم جاوید کی درخواست پر الیکشن کمیشن کو مہلت
سپریم کورٹ آف پاکستان نے شوکت بسرا اور صنم جاوید کے کاغذاتِ نامزدگی مسترد کرنے کے خلاف اپیل پر سماعت کرتے ہوئے الیکشن کمیشن کو تیاری کی مہلت دے دی۔
عدالتِ عظمیٰ نے شوکت بسرا کے کاغذاتِ نامزدگی مسترد کرنے کے خلاف اپیل پر سماعت کے دوران الیکشن کمیشن کو تیاری کے لیے 11 بجے تک کا وقت دے دیا۔
شوکت بسرا کے وکیل نے عدالت کو بتایا کہ میرے مؤکل کے کاغذات مشترکہ اکاؤنٹ کی وجہ سے مسترد ہوئے۔
جسٹس منیب اختر نے سوال کیا کہ کیا کاغذات پر کسی نے اعتراض کیا تھا؟
شوکت بسرا کے وکیل نے جواب دیا کہ ریٹرننگ افسر نے خود اس نکتے پر کاغذات مسترد کیے، مؤکل نے ریٹرننگ افسر کو نیا سنگل اکاؤنٹ دینے کا کہا، اس کے باجود کاغذات مسترد ہو گئے۔
جسٹس منیب اختر نے ہدایت کی کہ الیکشن کمیشن اس نکتے پر 11 بجے تیاری کر کے جواب دے۔
سپریم کورٹ آف پاکستان نے صنم جاوید کے کاغذاتِ نامزدگی مسترد کرنے کے خلاف اپیل پر سماعت کرتے ہوئے بھی الیکشن کمیشن کو 11 بجے تک تیاری کا وقت دے دیا۔
درخواست گزار صنم جاوید کے وکیل نے عدالت کو بتایا کہ اس کیس میں بھی مشترکہ اکاؤنٹ کا نکتہ ہے، صنم جاوید کے کاغذات پر دوسرا اعتراض جیل سپرنٹنڈنٹ کے دستخط نہ ہونے کا لگایا گیا، تیسرا اعتراض صنم جاوید کے دستخط جعلی ہونے کا لگایا گیا۔
جسٹس منیب اخترنے سوال کیا کہ کیا اس کیس میں ریٹرننگ افسر کو نیا سنگل اکاؤنٹ ایڈجسٹ کرنے کی درخواست دی گئی۔
صنم جاوید کے وکیل نے جواب دیا کہ نہیں اس کیس میں سنگل اکاؤنٹ ایڈجسٹ کی ریٹرننگ افسر کو کوئی درخواست نہیں دی گئی۔
جسٹس منیب اختر نے ہدایت کی کہ الیکشن کمیشن اس کیس میں بھی11 بجے تیاری کر کے جواب دے۔
