دھرمیندر احسن خان کے گرویدہ ہوگئے، ویڈیو پیغام جاری
بھارتی لیجنڈری اداکار دھرمیندر کا پاکستانی خوبرو اداکار و میزبان احسن خان کے نام نیک خواہشات سے بھرپور پیغام سوشل میڈیا صارفین کو بھا گیا۔
فوٹو اینڈ ویڈیو شیئرنگ پلیٹ فارم انسٹاگرام پر پاکستانی اداکار نے بھارتی لیجنڈری اداکار کا ایک ویڈیو پیغام شیئر کیا ہے۔
اس مختصر ویڈیو پیغام میں دھرمیندر احسن خان کی تعریفیں کرتے ہوئے ان کے لیے نیک خواہشات کا اظہار کر رہے ہیں اور پاکستانیوں کو اپنا بھی کہہ رہے ہیں۔
بھارتی لیجنڈری اداکار اس ویڈیو پیغام میں مزید کہہ رہے ہیں کہ آپ سب میرے اپنے ہیں، آپ کو کبھی غیر نہیں سمجھا، آرٹسٹ بیشتر جذباتی ہوتے ہیں۔
ویڈیو پیغام کے آخر میں دھرمیندر نے ناصرف اداکار بلکہ ان کے اہل خانہ اور دوستوں کے لیے بھی نیک تمناؤں کا اظہار کیا۔
دھرمیندر کی جانب سے تعریفی پیغام موصول ہونے پر احسن خان بھی ان کے مشکور ہیں۔
انہوں نے انسٹا پوسٹ کے کیپشن میں لکھا کہ دھرمیندر جی آپ بہت مہربان ہیں، ان محبتوں کا شکریہ۔ فلم شعلے میں ویرو کا کردار ہمیشہ میرے پسندیدہ کرداروں میں سے ایک رہے گا۔
اس پوسٹ کے کمنٹس میں تبصرہ کرتے ہوئے صارفین نے احسن خان کو خوش قسمت قرار دیا کہ لیجنڈری اداکار نے ان کے لیے تعریفی کلمات کہے جبکہ بیشتر نے دھرمیندر کی تعریف بھی کی کہ انہوں نے روایتی حریف ملک کے فنکار کے لیے محبت اور دعاؤں سے بھرپور پیغام بھیجا۔
یاد رہے کہ اداکار ماضی کی بھارتی اداکارہ ممتاز بھی احسن خان کی گرویدہ نکلی تھیں۔
ممتاز کی پاکستان آمد پر احسن خان نے اپنی رہائش گاہ پر ان کے اعزاز میں عشائیہ رکھا تھا، جس میں اداکارہ ریشم، گلوکار شفقت امانت علی خان اور دیگر شخصیات نے شرکت کی تھی۔
اس کے علاوہ احسن خان نے سینئر بھارتی اداکارہ ممتاز کو پاکستانی بازاروں کی سیر اور شاپنگ بھی کروائی تھی جس کی تصاویر سوشل میڈیا پر وائرل ہوگئی تھیں۔
