بھارتی اداکارہ دلجیت کور اور نکھل پٹیل کے درمیان طلاق کی افواہیں
بھارتی اداکارہ دلجیت کور کی اپنے دوسرے شوہر نِکھل پٹیل سے علیحدگی کی خبریں زیرِ گردش ہیں۔
اداکارہ دلجیت کور کو ٹی وی سمیت بھارتی ریئلیٹی شو بگ باس کے کامیاب ترین سیزن 13 میں بھی دیکھا جا چکا ہے، وہ شو میں زیادہ آگے نہ جاسکی تھیں اور ابتدائی ہفتوں میں ہی بے گھر ہوگئی تھیں۔
گزشتہ سال دلجیت کور نے بزنس مین نکھل پٹیل سے شادی کے بعد کینیا میں مستقل طور پر شفٹ ہونے کا اعلان کیا تھا۔
یاد رہے کہ دلجیت کور کے چاہنے والے ان کی دوسری شادی پر بے حد خوش تھے لیکن اب ان کے انسٹاگرام اکاؤنٹ پر نظر آنے والی ایک بہت بڑی تبدیلی نے سب کو فکرمند کر دیا ہے۔
دلجیت کور نے اپنے اور نکھل پٹیل کے درمیان علیحدگی سے متعلق افواہوں کو مزید ہوا دی ہے۔
اداکارہ نے اپنے دوسرے شوہر نکھل پٹیل کو اپنے انسٹاگرام اکاؤنٹ سے اَن فالو کر دیا ہے۔
دلجیت کور نے ناصرف اپنے انسٹاگرام اکاؤنٹ سے نِکھل کے ساتھ شیئر کی گئیں تمام تصویریں ڈیلیٹ کی ہیں بلکہ انسٹاگرام ہینڈل سے اپنے نام کے ساتھ لکھا گیا ’پٹیل‘ بھی ہٹا دیا ہے۔
دلجیت کور کا یہ عمل اس جوڑی کے مداحوں کو کچھ خاص نہیں بھایا ہے اور اُن کے فالوور کافی پریشان نظر آ رہے ہیں کیوں کہ دلجیت کی انسٹاگرام اکاؤنٹ میں کی گئی تبدیلیاں ان کی نکھل پٹیل سے علیحدگی کی جانب ایک اہم اشارہ ہے۔
یاد رہے کہ دلجیت کور نے سال 2009ء میں اپنے ساتھی اداکار شالین بھنوٹ سے شادی کی تھی۔
دونوں 2006ء میں ڈرامہ ’کُل ودھو‘کے سیٹ پر ملے تھے اور ایک دوسرے کی محبت میں گرفتار ہوگئے تھے۔
اس جوڑی کا ایک بیٹا بھی ہے جس کا نام جارڈن ہے۔
شادی کے 6 سال بعد دلجیت اور شالین میں علیحدگی ہوگئی تھی۔
