ایل اوہسپیتالیت میں دکانوں پر پولیس کے چھاپے ، 100 سے زائد خلاف ورزیاں پکڑی گئیں

ایل ااوہسپیتالیت میں قانون نافذ کرنے والے اداروں نے مشترکہ کارروائی کرتے ہوئے ٹیکس فراڈ، بجلی چوری اور دیگر بے ضابطگیوں کے خلاف بڑا کریک ڈاؤن کیا، جس کے دوران 24 سپر مارکیٹوں اور خوراک کی دکانوں میں 100 سے زائد خلاف ورزیاں سامنے آئیں۔

یہ آپریشن 17 مارچ کو گواردیا سول پولیس کی قیادت میں کیا گیا، جس میں نیشنل پولیس مقامی شہری پولیس، لیبر و سوشل سکیورٹی انسپیکشن (ITSS) اور بجلی فراہم کرنے والی کمپنی Endesa نے بھی حصہ لیا۔ کارروائی ٹیکس چوری اور بجلی کے غیر قانونی استعمال کے خلاف جاری مہم کے دوسرے مرحلے کا حصہ تھی۔

حکام کے مطابق مجموعی طور پر 126 انتظامی خلاف ورزیاں ریکارڈ کی گئیں، جبکہ 14 افراد کے خلاف بجلی چوری کے الزام میں تحقیقات شروع کی گئیں۔ اس کے علاوہ 37 افراد کی شناخت بھی کی گئی۔ کارروائی کے دوران مختلف دکانوں میں خوراک کی حفاظت کے اصولوں کی خلاف ورزی، غیر قانونی درآمدات، لیبر قوانین کی پامالی اور ممکنہ اسمگلنگ کے شواہد بھی سامنے آئے۔

بجلی کے شعبے میں صورتحال خاص طور پر تشویشناک رہی، جہاں 24 میں سے 16 مقامات پر بجلی چوری پکڑی گئی، جو کل کا 67 فیصد بنتی ہے۔ ان میں سے 14 کنکشن فوری طور پر منقطع کر دیے گئے جبکہ دو کو درست طریقے سے بحال کیا گیا۔ حکام کے مطابق چوری کی گئی بجلی کی مقدار 1,159,678 کلو واٹ آور رہی، جو تقریباً 331 گھروں کے سالانہ استعمال کے برابر ہے۔ اس کے علاوہ 529 کلو واٹ سے زائد بجلی کی طاقت کو بھی نیٹ ورک سے الگ کیا گیا۔

مزید برآں، گواردیا سول پولیس نے خوراک کی حفاظت اور ڈیٹا پروٹیکشن سے متعلق 50 خلاف ورزیاں نوٹ کیں، جن میں زائد المیعاد اشیاء کی فروخت اور مصنوعات کی مکمل معلومات نہ ہونا شامل ہے۔ شہری پولیس نے 67 جرمانے عائد کیے، جن کا تعلق لائسنس، انشورنس اور فائر سیفٹی قوانین سے تھا۔

کارروائی کے دوران نیشنل پولیس اور لیبر انسپیکشن نے 38 افراد کی شناخت کی، ایک شخص کو گرفتار کیا گیا جبکہ چار افراد کے خلاف امیگریشن قوانین کی خلاف ورزی پر مقدمات درج کیے گئے۔ یہ کارروائی علاقے میں غیر قانونی سرگرمیوں کے خلاف ایک اہم پیش رفت قرار دی جا رہی ہے۔