ڈاکوؤں کی فائرنگ سے میٹرک کا طالب علم جاں بحق

کراچی میں ڈاکوؤں نے ایک اور گھر اجاڑ ڈالا، کھیل کا میدان تو میسر نہیں ایان گلی میں کرکٹ کھیل رہا تھا ڈاکوؤں کی گولی کا نشانہ بن گیا۔

 مقتول میٹرک کا طالب علم محمد ایان محلے والوں کیلئے تو چھوٹا بچہ لیکن اپنے گھر والوں کا سہارا تھا، کراچی میں رواں ماہ اسٹریٹ کرمنلز نے اب تک 8 افراد کی جان لے لی ہے۔

کراچی کے علاقے کورنگی سیکٹر 50 اے میں دو روز قبل ڈاکوؤں کی فائرنگ سے زخمی ہونے والا 17 سال کا محمد ایان دوران علاج چل بسا۔ واردات کے وقت ایان گھر کے باہر بھائی اور دوستوں کے ساتھ کرکٹ کھیل رہا تھا۔

ایان کی موت نے اہل محلہ کو غمگین کر دیا، مقتول ایان تین بہن بھائیوں میں سب سے بڑا تھا۔

 علاقہ مکینوں کا دعویٰ ہے کہ علاقے میں اسٹریٹ کرائم کی وارداتیں عروج پر ہیں اور کوئی پوچھنے والا نہیں ہے۔