دوہری شہریت کے معاہدے کا مطالبہ۔

جنرل سیکریٹری پاک فیڈریشن اسپین بیریسٹر عدیل خان یوسفزئی نے حکومتِ پاکستان کے اعلیٰ حکام و عہدران کو باضابطہ تحریری درخواست ارسال کی ہے، جس میں اسپین میں مقیم پاکستانیوں کے لیے دوہری شہریت (Dual Nationality) کے معاہدے کی گزارش کی ہے۔اس سے پہلے بھی بہت سے کیمیونیٹی احباب گاہے بگاہے ہر سطح پر دوہری شہریت کا معاملہ اٹھاتے رہے ہیں ہیں ۔

یاد رہے کہ سپین میں رہنے والی پاکستانی کمیونیٹی کا یہ دیرینہ مطالبہ ہے کہ حکومت پاکستان سپین سے دوہری شہریت کا معاہدہ کرے کیونکہ ابھی تک جو پاکستانی سپین کی شہریت حاصل کرتے ہیں قانونی طور پر انھیں پاکستانی پاسپورٹ چھوڑنا پڑتا ہے ۔ وطن کی محبت میں سرشار بہت سے لوگوں کے لیے مادر وطن کا پاسپورٹ چھوڑنا اتنا آسان نہیں مگر بسلسلہ کاروبار و روز گار انھیں اس تکلیف سے گزرنا پڑتا ہے۔ دوسرا یہ کہ اپنی میراث و جائیداد کے حق کے لیے پاکستانی پاسپورٹ اوورسیز کے لیے زیادہ فوائد کا حامل ہے۔ تیسری اہم بات یہ ہے کہ ترسیلات زر بھی بڑھیں گی کیونکہ انویسٹمنٹ کے لیے اور جائیداد کی خرید و فروخت کے پاکستانی مادر وطن کی طرف بھی توجہ رکھے گا۔ چوتھا یہ کہ حالیہ اوورسیز کنوینشن کے دوران وزیراعظم نے اوورسیز کے لیے پاکستانی یونیورسٹیز، میڈیکل کالجز اور دیگر اداروں میں جو کوٹہ مخصوص کیا ہے دوہری شہریت رکھنے والے سپین کے رہائشی اسانی سے فائدہ اٹھا سکتے ہیں۔ سب سے بڑا فائدہ یہ ہے کہ ہماری انے والی نسلوں کے بچے پاکستانی نژاد نہیں بلکہ پاکستانی کہلائیں گے۔

حکومتِ پاکستان اب تک 22 ممالک کے ساتھ دوہری شہریت کے معاہدے کر چکی ہے، مگر افسوس کہ اسپین، جہاں پاکستانیوں کی یورپ میں دوسری سب سے بڑی آبادی موجود ہے، ابھی تک اس فہرست میں شامل نہیں ہو سکا۔

اسپین میں اندازاً ڈیڑھ لاکھ پاکستانی قانونی طور پر مقیم ہیں، جبکہ ہزاروں غیر قانونی اور غیر دستاویزی پاکستانی بھی رہائش پذیر ہیں اور وہ سپین کے ارایئگو سوشیال یا کاغذات حاصل کرنے کے دیگر قانونی چینلز سے گزر رہے۔ اس کے علاؤہ 36000 کے قریب پاکستانی سپینش نیشنیلٹی کے حامل ہیں۔

مستقل کارڈ رکھنے والوں میں سے توقع کی جا رہی ہے کہ آئندہ پانچ سالوں میں ان میں سے بڑی تعداد ہسپانوی شہریت حاصل کر لے گی۔

پاک فیڈریشن کے سیکرٹری جنرل بیریسٹر عدیل خان یوسفزئی نے اپنی باضابطہ درخواست مندرجہ ذیل اعلیٰ حکام کو پیش کی ہے:

1. جناب میاں محمد شہباز شریف – وزیرِاعظم پاکستان

2. جناب محمد اسحاق ڈار – نائب وزیرِاعظم و وزیرِ خارجہ

3. سینیٹر اعظم نذیر تارڑ – وفاقی وزیرِ قانون و انصاف

4. چوہدری سالک حسین – وفاقی وزیر برائے اوورسیز پاکستانی و انسانی وسائل

5. سکندر سلطان راجہ – چیف الیکشن کمشنر آف پاکستان

6. سید یوسف رضا گیلانی – چیئرمین سینیٹ آف پاکستان

7. سردار ایاز صادق – اسپیکر نیشنل اسمبلی

8. جنرل سید عاصم منیر، نشانِ امتیاز (ملٹری) – چیف آف آرمی اسٹاف، جی ایچ کیو

9. راجہ پرویز اشرف سابق وزیراعظم و ممبر نیشل اسمبلی۔

شعبہ نشرواشاعت پاک فیڈریشن سپین۔