راحت فتح علی کا شاگرد پر تشدد، مشی خان نے کیا کہا؟

پاکستان شوبز انڈسٹری کی معروف اداکارہ مشی خان نے شاگرد پر تشدد کی ویڈیو وائرل ہونے پر عالمی شہرت یافتہ گلوکار راحت فتح علی خان کو سخت تنقید کا نشانہ بنایا ہے۔

 مشی خان نے فوٹو اینڈ ویڈیو شیئرنگ ایپ انسٹاگرام پر اپنی ایک ویڈیو شیئر کی ہے جس میں وہ راحت فتح علی خان پر سخت تنقید کرتی نظر آ رہی ہیں۔

اُنہوں نے گلوکار سے مخاطب ہوتے ہوئے کہا کہ راحت فتح علی خان صاحب! آپ مشہورِ زمانہ گلوکار ہیں، آپ کے پاس ان گنت پیسہ ہے اور آپ کی مجھے لگ رہا ہے یہ کوئی ’شہد کی بوتل‘ ہے جس کے گم ہو جانے پر  آپ اپنے اسٹاف کو جانوروں کی طرح مار رہے ہیں۔

اداکارہ نے کہا کہ  آپ کو شرم نہیں آئی ایسی گھٹیا حرکت کرتے ہوئے، آپ کے پاس اتنا پیسہ ہے کہ آپ کی جو بھی شہد کی بوتل غائب ہوئی ہے اس کے بدلے میں آپ 10 کریٹ شہد کی بوتلوں کے خرید سکتے ہیں، آپ ایک بوتل کے لیے اپنے ملازم کو اتنی بری طرح مار رہے ہیں، بس اتنا ہی بڑا دل ہے اور انسانی بنیادوں پر ضرورت مندوں کی مدد بھی ایسے ہی کرتے ہوں گے۔

اُنہوں نے ویڈیو کے آخر میں کہا کہ اللّٰہ نے آپ لوگوں کو اتنی عزت دی ہے وہ آپ سے سنبھالی نہیں جا رہی ہے۔