آننت امبانی کی شادی پر پرفارم کرنے کیلئے ریحانہ کو کتنا معاوضہ دیا گیا؟

باربیڈین گلوکارہ، اداکارہ و کاروباری شخصیت ریحانہ آج یکم مارچ کو جام نگر میں آننت امبانی اور رادھیکا مرچنٹ کی شادی میں پرفارم کریں گی۔

بھارتی میڈیا ’انڈیا ٹوڈے‘ کی جانب سے ریحانہ کی پرفارمنس اور اس کے بدلے میں ملنے والے معاوضے سے متعلق تفصیلات جاری کی گئی ہیں۔

یاد رہے کہ آننت امبانی اور رادھیکا مرچنٹ کی ’پری ویڈنگ سرمنیز‘ (شادی سے قبل کی تقریبات) جام نگر میں جاری ہیں جس میں ریحانہ آج اپنی پرفارمنس سے مہمانوں کو محظوظ کریں گی۔

بھارتی میڈیا کے مطابق گلوکارہ ریحانہ کو مبینہ طور پر شادی پر پرفارم کرنے کے لیے 50 کروڑ سے زائد معاوضہ ادا کیا گیا ہے، ریحانہ کی پرفارمنس آج شام 5:30 بجے متوقع ہے۔

ریحانہ کے علاوہ دلجیت دوسانجھ بھی آج کی شاندار تقریب میں مہمانوں کے لیے پرفارم کریں گے۔

واضح رہے کہ پاپ آئیکون، گلوکارہ ریحانہ شاذ و نادر ہی نجی تقریبات میں پرفارم کرتی ہیں، اُنہیں اس پرتعیش شادی میں پرفارم کرنے سے قبل ہی بھاری رقم ادا کر دی گئی ہے۔

دوسری جانب بھارتی میڈیا کی جانب سے دعویٰ کیا گیا ہے کہ ریحانہ عام طور پر نجی تقریبات میں پرفارم کرنے کے لیے کم از کم  66 سے 74 کروڑ روپے کا معاوضہ وصول کرتی ہیں۔

یاد رہے کہ آننت اور رادھیکا کی شادی کی تقریبات کا آغاز آج سے جام نگر میں ہو رہا ہے۔

’ایورلینڈ میں ایک شام‘ کے عنوان سے آج شادی کے سلسلے میں پہلی تقریب منعقد کی جائے گی۔