فلم ’جوان‘ کے ہدایتکار نے ایوارڈ ملنے پر شاہ رخ خان کے پاؤں چھو لیے، ویڈیو وائرل
گزشتہ سال ریلیز ہونے والی بالی ووڈ کی بلاک بسٹر فلم ’جوان‘ کے ہدایتکار ایٹلی نے ایوارڈ ملنے پر شاہ رخ خان کے پاؤں چھو لیے۔
’زی سینے ایوارڈز‘ کی تقریب سے سوشل میڈیا کے مختلف پیجز پر ایک ویڈیو وائرل ہو رہی ہے جس میں ایٹلی کو فلم ’جوان‘ کے لیے بہترین ہدایتکار کا ایوارڈ ملنے پر شاہ رخ خان کے پاؤں چھوتے ہوئے دیکھا جا سکتا ہے جبکہ بھارتی ہدایتکار کے اس اقدام پر بالی ووڈ کے بادشاہ اُٹھ کر اُنہیں اپنے پاؤں چھونے سے روکتے اور گلے لگاتے نظر آ رہے ہیں۔
سوشل میڈیا پر یہ ویڈیو تیزی سے وائرل ہو رہی ہے اور صارفین کی جانب سے اس پر ملے جلے سے ردِ عمل کا اظہار کیا جا رہا ہے۔
یاد رہے کہ ایٹلی کی ہدایت کاری میں بننے والی فلم ’جوان‘ نے شاہ رخ خان کی ہی ایک اور بلاک بسٹر فلم ’پٹھان‘ کے مجموعی بزنس کو پیچھے چھوڑ کر نیا ریکارڈ اپنے نام کیا تھا۔
