کندھکوٹ میں پرائمری ٹیچر کے قتل میں ملوث ملزمان گرفتار، ترجمان رینجرز
ترجمان رینجرز نے کہا ہے کہ کندھکوٹ میں پرائمری ٹیچر اللّٰہ رکھیو نندوانی کے قتل میں ملوث ملزمان کو گرفتار کر لیا گیا ہے۔
رینجرز کا کہنا ہے کہ ملزمان ٹیچر اللّٰہ رکھیو کے قتل اور سہولت کاری میں ملوث ہیں، ملزمان کو تنگوانی کے گاؤں سیفل سے گرفتار کرکے پولیس کے حوالے کر دیا گیا۔
واضح رہے کہ چند روز قبل کچے کے ڈاکوؤں نے پرائمری اسکول کے ٹیچر اللّٰہ رکھیو نندوانی کو قتل کردیا تھا۔
اللّٰہ رکھیو نندوانی کچے کے ڈاکوؤں کے خطرے کے باوجود بچوں کو پڑھانے کے لیے اسکول پہنچتا تھا۔
وہ گوٹھ نصراللّٰہ بجارانی میں واقع اسکول میں موٹرسائیکل پر اپنی بندوق لے کر پہنچتا تھا۔
چند روز پہلے اللّٰہ رکھیو نندوانی کے بندوق لے کر اسکول جانے کی ویڈیو بھی وائرل ہوئی تھی۔
اس ویڈیو میں اللّٰہ رکھیو نندوانی نے کہا تھا کہ وہ بچوں کے مستقبل کےلیے جان کو خطرے میں ڈالتا ہے۔
