تریپتی دیمری نے پریانکا چوپڑا کو اپنا آئیڈیل قرار دے دیا

فلم اینمیل سے شہرت کی بلندیوں پر پہنچنے والی بالی ووڈ اداکارہ اور ماڈل تریپتی دیمری نے بالی ووڈ کی معروف اداکارہ پریانکا چوپڑا کی تعریف کرتے ہوئے انہیں اپنا آئیڈیل قرار دے دیا۔

ایک حالیہ انٹرویو میں تریپتی دیمری سے سوال پوچھا گیا کہ وہ پریانکا میں کیا چیز پسند کرتی ہیں؟ تو اس کے جواب میں انہوں نے کہا کہ "وہ بہت پُراعتماد خاتون ہیں، کسی اور ملک جانے اور دوبارہ کیریئر شروع کرنا بہت ہی جرات کی بات ہوتی ہے، اور ایسا کرنے کی جرات وہی کر سکتی تھیں۔” 

تریپتی دیمری نے مزید کہا کہ پریانکا کی طرح کی اداکارہ سے بہت کچھ سیکھنے کو ملتا ہے۔

پریانکا چوپڑا کے فلمی کیریئر اور ان کی اداکاری سے متعلق بات کرتے ہوئے تریپتی دیمری نے کہا کہ مجھے لگتا ہے کہ وہ ہر فلم میں شاندار اداکاری کرتی ہیں خاص طور پر فلم ’برفی‘ میں انہوں نے بہترین اداکاری کا مظاہرہ کیا تھا۔

انہوں نے کہا کہ مجھے یاد ہے جب میں نے فلم برفی میں ان کی اداکاری دیکھی تو میں پہچان ہی نہیں سکی کہ یہ پریانکا چوپڑا ہیں۔

تریپتی دیمری نے یہ بھی کہا کہ میں خود بھی ایسی اداکارہ بننا چاہتی ہوں، اگر میں کسی پروجیکٹ پر کام کروں تو اسے دیکھ کر لوگ کہیں کہ یہ تریپتی نہیں لگتی اور مجھے لگتا ہے کہ ایک فنکار کے لیے یہی سب سے بڑی تعریف ہے۔