بھارتی گلوکار لکی علی کا لائیو کنسرٹ میں فلسطینیوں سے اظہارِ یکجہتی، شرکاء نے کیا ردّ عمل دیا؟

بھارتی گلوکار لکی علی نے دبئی میں اپنے لائیو کنسرٹ کے دوران غزہ میں جاری اسرائیل کے خلاف نہتے فلسطینیوں سے اظہارِ یکجہتی کیا ہے۔

سوشل میڈیا پر لکی علی کے دبئی میں ہونے والے کنسرٹ سے ایک ویڈیو وائرل ہو رہی ہے جس میں اُنہیں غزہ میں جاری اسرائیلی جارحیت کی مذمت کرتے ہوئے دیکھا جاسکتا ہے۔

اُنہوں نے اسرائیلی وزیراعظم بنجمن نیتن یاہو کے ایک بیان کو دہراتے ہوئے کہا کہ’میں نیتن یاہو کے ایک ریاست والے بیان سے متفق ہوں اور صرف اتنا کہنا چاہتا ہوں کہ یہ بالکل صحیح کہا کہ یہاں صرف ایک ریاست ہونی چاہیے لیکن وہ ریاست فلسطین کی ہوگی‘۔

لکی علی نے کہا کہ’اسرائیلی بھی وہاں رہ سکتے ہیں لیکن ریاست فلسطین ہونی چاہیے‘۔

کنسرٹ میں موجود شرکاء نے بھارتی گلوکار کی یہ بات سن کر زوردار آواز میں نعرے لگا کر خوشی کا اظہار کیا۔

واضح رہے کہ اس سے قبل نومبر 2023ء میں بھی لکی علی سوشل میڈیا ویب سائٹ ایکس پر اسرائیل کی حمایتی اپنی بھارتی حکومت کے برعکس مظلوم فلسطینیوں کے لیے اپنی آواز اٹھا چکے ہیں اور انہوں نے فلسطین جانے کی خواہش کا اظہار بھی کیا ہے۔