شاہ رخ خان کی فلم ’پٹھان‘ پر رانی مکھرجی کا کیا کہنا ہے؟
بالی ووڈ کی معروف اداکارہ رانی مکھرجی نے اپنے دوست، بالی ووڈ کے کنگ، شاہ رخ خان کی فلم ’پٹھان‘ کی تعریفوں کے پُل باندھتے ہوئے کہا ہے کہ اس فلم نے سینما گھروں پر شائقین کے دروازے کھول دیے ہیں۔
یاد رہے کہ شاہ رُخ خان کی فلم ’پٹھان‘ یش راج فلمز کے بینر تلے بنی تھی۔
بھارتی سینئر فلمساز یش چوپڑا ’یش راج فلمز‘ کے بانی ہیں جبکہ اداکارہ رانی مکھرجی ان کی بہو اور فلمساز اور ڈسٹریبیوٹرز آدیتیہ چوپڑا کی اہلیہ ہیں۔
رانی مکھرجی نے 2014ء میں پروڈیوسر آدیتیہ چوپڑا سے شادی کی تھی۔
رانی مکھرجی نے حال ہی میں فلم ’پٹھان‘ کو ’یش راج فلمز‘ کے لیے تازہ ہوا کا جھونکا قرار دیا ہے۔
اُن کا شاہ رخ خان کی فلم سے متعلق کہنا تھا کہ فلموں کے لگاتار فلاپ ہونے کے بعد یش راج فلمز کی ’پٹھان‘ گیم چینجر ثابت ہوئی۔
اس دوران رانی مکھرجی نے اپنے شوہر آدیتیہ چوپڑا کے بارے میں بھی بات کی۔
رانی کا کہنا تھا کہ ان کے شوہر نے اپنے دل کی آواز سنی اور کورونا وبا کے دوران فلموں کی تھیٹر میں ریلیز پر زور دیا۔
رانی مکھرجی نے مزید کہا کہ ’جب تھیٹرز میں فلمیں لگیں تو وہ تمام فلمیں فلاپ ہوگئیں کیونکہ ناظرین کو اب او ٹی ٹی پر زیادہ مواد دیکھنے کو ملتا ہے، او ٹی ٹی نے راتوں رات ناظرین کا محظوظ ہونے کا طریقہ بدل دیا ہے۔‘
رانی مکھرنی نے مزید کہا کہ تھیٹر پر لگنے والی تمام فلمیں فلاب ہوئیں، یہ صورتحال کسی ڈپریشن سے کم نہ تھی، ہماری کمپنی کے لوگ غمگین تھے اور اُنہیں پورا یقین تھا کہ آدیتیہ کی فلمیں تھیٹر میں ریلیز ہوں گی اور اچھا کاروبار کریں گی۔‘
اداکارہ کا کہنا تھا کہ ایسی غیر یقینی کی صورتحال میں پھر فلم پٹھان آئی اور سِرے سے ہی سب بدل گیا اور یہ سب سے زیادہ کمائی کرنے والی فلم بن گئی۔
یاد رہے کہ فلم پٹھان 2023ء کی سب سے زیادہ کمائی کرنے والی فلموں میں سے ایک ہے۔
فلم ’پٹھان‘ میں شاہ رخ خان کے ہمراہ اداکارہ دیپیکا پڈوکون اور جان ابراہم کو بھی دیکھا گیا تھا۔
