دانیال ظفر کی شخصیت ایسی ہے کہ اسے دیکھتے ہی پیار ہوجائے، نادیہ خان
سینیئر اداکارہ و ٹی وی میزبان نادیہ خان نے معروف گلوکار علی ظفر کے چھوٹے بھائی، گلوکار و اداکار دانیال ظفر کی اداکاری اور شخصیت کی تعریفوں میں پُل باندھ دیے ہیں۔
سابقہ اداکارہ نادیہ حسین نے حال ہی میں ہدایتکار و اداکارہ مرینہ خان اور روبینہ اشرف کے ہمراہ ایک شو میں بطور مہمان شرکت کی۔
اس دوران یہ تینوں سینئر اداکارائیں آن ایئر ڈراموں اور ان میں ابھرتے فنکاروں کی اداکاری پر اپنی اپنی رائے کا اظہار کر رہی تھیں۔
نادیہ خان نے دانیال ظفر کی اداکاری اور شخصیت پر بھی بات کی۔
اداکارہ کا کہنا تھا کہ وہ اسکرین پر ہیرو لگتے ہیں مگر ہیرو دکھنے کی کوشش نہیں کرتے، وہ اپنے مخصوص اور قدرتی لاہوری انداز میں اداکاری کرتے ہیں، اُن کی اداکاری بہت سادہ، سنجیدہ اور اپنے کردار سے بہت مخلص ہوتی ہے۔
اس دوران شو میں موجود مرینہ خان اور روبینہ اشرف نے بھی نادیہ خان کے اس بیان کی حمایت کی۔
نجی ٹی وی کے ڈرامہ سیریل ’اسٹینڈ اپ گرل‘ میں دانیال ظفر کی جانب سے کی گئی اداکاری کی تعریف کرتے ہوئے نادیہ خان کا مزید کہنا تھا کہ مجھے دانیال ظفر کی اداکاری بہت اچھی لگی، دانیال ظفر کی شخصیت ایسی ہے کہ اسے دیکھتے ہی اس لڑکے سے پیار ہوجائے۔
یاد رہے کہ ’اسٹینڈ اپ گرل‘ ایک کامیڈی ڈرامہ سیریل ہے جس میں دانیال ظفر کے مدِ مقابل اداکارہ زارا نور عباس کام کر رہی ہیں۔
