مایوس ثناء جاوید کو شعیب ملک نے خوش کر دیا

جہاں پاکستان سپر لیگ 9 کرکٹ شائقین کو مسلسل اپنی جانب متوجہ کیے ہوئے ہے وہیں نوبیاہتا جوڑا ثناء جاوید اور شعیب ملک بھی مداحوں کی آنکھوں کا تارا بنے ہوئے ہیں۔

پاکستان سپر لیگ کی فرنچائز کراچی کنگز کے ہر میچ کے دوران کیمرہ مین گراؤنڈ میں بیٹھی کرکٹر شعیب ملک کی اہلیہ، ثناء جاوید کو خصوصی توجہ دیتے ہیں۔

یہی وجہ ہے کہ سوشل میڈیا پر ثناء جاوید آج کل کافی اِن ہیں اور اُن کے چہرے کے تاثرات پر خوب تبصرے بھی کیے جاتے ہیں۔

یاد رہے کہ گزشتہ دنوں پاکستان سُپر لیگ 9 کی فرنچائز کراچی کنگز کے آل راؤنڈر شعیب ملک صرف 12 رنز بنا کر پویلین لوٹ گئے تھے جس پر گراؤنڈ میں بیٹھی ان کی اہلیہ، ثناء جاوید افسردہ ہوگئی تھیں۔

اداکارہ کی مایوسی کیمرے کی آنکھ نے محفوظ کرلی تھی اور یہ منظر دیکھتے ہی دیکھتے سوشل میڈیا کی زینت بن گیا تھا۔

اب گزشتہ روز پاکستان سپر لیگ 9 کے اہم میچ میں کراچی کنگز نے کوئٹہ گلیڈی ایٹرز کو یکطرفہ مقابلے کے بعد 7 وکٹوں ہرا دیا۔

میچ کے دوران شعیب ملک 27 رنز بنا کر ناٹ آؤٹ رہے اور اپنی ٹیم کو فتح دلوائی۔ 

ثناء جاوید نے اپنے شوہر، شعیب ملک کی اس کارکردگی پر اُنہیں ہیرو قرار دیا ہے۔

ثناء جاوید نے اپنے انسٹاگرام اکاؤنٹ پر پی ایس ایل کے تصدیق شدہ پیج سے شعیب ملک کے میچ ختم کرنے کی ویڈیو شیئر کی ہے اور ساتھ میں کیپشن میں آگ، دل اور جیت کا جشن منانے کا ایموجی استعمال کرتے ہوئے شعیب ملک کو ’ہیرو‘ قرار دیا ہے۔