سانچیز نے ہانٹا وائرس بحران اور ایم وی ہونڈیئس کے ریسکیو کو “دنیا کے لیے مثال” قرار دے دیا
Screenshot
ہسپانوی وزیرِ اعظم پیدرو سانچیز نے ہانٹا وائرس سے متاثرہ بحری جہاز “ایم وی ہونڈیئس” کے انخلا آپریشن کو ایک بڑی کامیابی قرار دیتے ہوئے کہا ہے کہ یہ ایسا واقعہ ہے جسے دنیا برسوں تک یاد رکھے گی۔
حکومت اس پورے آپریشن کی کامیاب تکمیل پر اطمینان کا اظہار کر رہی ہے اور حکام کے مطابق اس بحران سے نمٹنے کا طریقہ “ایک کامیابی” رہا ہے۔
ایک ہفتے کی شدید مصروفیات کے بعد حکومت نے سکھ کا سانس لیا ہے۔ منگل کے روز وزیرِ اعظم سانچیز نے عالمی ادارہ صحت (WHO) کے ڈائریکٹر جنرل ٹیڈروس اذانوم کے ساتھ مشترکہ پریس کانفرنس کی، جس میں اس آپریشن کو سراہا گیا۔
سانچیز کے مطابق یہ کارروائی حکومت کے بحران سے نمٹنے کے ریکارڈ میں ایک اور اہم سنگِ میل ہے۔ انہوں نے کہا “اسپین نے دنیا کے سامنے ایک مثال قائم کی ہے۔ یہ برسوں تک یاد رکھا جائے گا کیونکہ یہ ہمارے قومی کردار اور ہمارے وژن کی عکاسی کرتا ہے۔”
وزیرِ اعظم نے کینری جزائر کی علاقائی حکومت کے ساتھ اختلافات پر براہِ راست بات کرنے سے گریز کیا، تاہم انہوں نے بالواسطہ پیغام دیا کہ اسپین نے نہ صرف اپنے شہریوں کی حفاظت کی بلکہ انسانیت اور عالمی ذمہ داری کا بھی ثبوت دیا۔
سانچیز نے کہا کہ حکومت نے ہمیشہ سائنسی بنیادوں اور ماہرین کے مشورے کے تحت بحرانوں کا سامنا کیا ہے اور یہی حکمتِ عملی اس بار بھی اپنائی گئی۔
دوسری جانب عالمی ادارہ صحت کے سربراہ نے اسپین کی بھرپور تعریف کرتے ہوئے کہا کہ“اسپین کی قیادت قابلِ تحسین ہے۔ دنیا کو اس ردِعمل پر فخر ہونا چاہیے۔ وائرس سرحدیں نہیں پہچانتے، اور ہماری سب سے بڑی طاقت یکجہتی ہے، جو اسپین نے دکھائی ہے۔”
انہوں نے مزید بتایا کہ کینری جزائر کے دورے کے دوران مقامی لوگوں نے غیر معمولی ہمدردی اور تعاون کا مظاہرہ کیا، اور بہت سے افراد نے اس آپریشن پر فخر کا اظہار کیا کیونکہ متاثرہ مسافروں کو مدد اور محبت کی ضرورت تھی۔
About The Author
